Tusenvis av ukrainske soldatar er sende i fangeleirar

Etter å ha halde stand i nesten tre månader mot russisk bombardement i dei underjordiske gangane og bunkerar i stålverket Azovstal, var det slutt fredag kveld.

Ifølgje Russland har i alt 2439 ukrainske soldatar overgitt seg frå stålverket.

Dei er frakta til provisoriske fangeleirar på russisk-kontrollert territorium, til byen Olenivka i Donetsk-regionen.

Russiske styresmakter har send ut bilete som vise trøytte og motlause soldatar for å vise at Ukraina har tapt slaget om den viktige hamnebyen Mariupol.

• Russisk propaganda: Fremstiller sønderbombede Mariupol som smilende idyll

Fekk ordre om å overgi seg

Ein av kommandantane på stålverket, Denis Prokopenko, seier i ein video som vart lagd ut på sosiale medium, at ordren om å overgi seg kom frå øvste hald i den ukrainske militærleiinga.

– Vi er beordra til å redde liv, å verne om soldatane i garnisonen og gi opp forsvaret av byen, seier han.

Sjølv om russerane no seier at alle dei ukrainske soldatane er ute av stålverket, er det enno ikkje stadfesta av Ukraina.

Russiske styresmakter seier soldatane skal få helsehjelp og bli behandla som vanlege krigsfangar. Det gjeld ikkje dei som russarane meiner har gjort krigsbrotsverk, vert det åtvara. Dei vil bli stilte for retten.

«Frå eit helvete til eit anna»

Mange av dei pårørande fryktar no kva som vil skje med soldatane. Natalia Zarytska er ei av kvinnene som er svært uroleg.

– Mannen min er på veg frå eit helvete til eit anna, seier ho.

– Han blir frakta frå stålverket Azovstal til fengsel, til fangenskap. Det er veldig tøft, både for meg og han, seier ho.

Russiske styresmakter seier at dei har «frigjort» Mariupol. Med full kontroll i regionen, kan dei no konsentrere seg om nye mål.

Rakettangrep mot kulturhus

Fredag vart det meld om nye russiske angrep nord og sørvest i landet.

I byen Lozova i Kharkiv fylke nord i Ukraina trefte ein russisk rakett kulturhuset i byen fredag ettermiddag.

Kulturhuset var nettopp ferdig pussa opp. Den ukrainske presidenten Volodymyr Zelenskyj kalla angrepet på kulturhuset for «barbarisk».

Minst sju menneske, mellom dei eit barn, vart skadde i angrepet som utløyste ein enorm sky av støv og strødde bygningsdelar over eit stort område.

Øydelagd ferieby

I feriebyen Zatoka som ligg seks mil sør for Odesa, er skadane store etter eit russisk missilangrep 16. mai.

Bak sanddynene ligg hotell og restaurantar utbomba. Vindauge er knuste, markiser og strandstolar ligg slengde rundt. Bilar er utbrente og palmar knekte. Brannane som vart utløyste er sløkte, men oppryddinga er berre så vidt komen i gang.

Det er lenge til turistane kan vende tilbake til badestranda i Zatoka.

Zelenskyj krev at Russland må betale

Russland må stillast økonomisk til ansvar for øydeleggingane i Ukraina, meiner den ukrainske presidenten.

I sin daglege videotale fredag kveld sa Zelenskyj at Russland må betale for kvar einaste heim, skule, sjukehus og forretningslokale som dei øydelegg. Han vil ha ei eiga kompensasjonsordning for dette.

I talen viste han til ferske angrep, mellom anna mot Odesa, Poltava og Zjytomyr.

.