Bygning kollapsa etter tungt snøfall - ti omkomne og over 100 skadde

Meldingane frå Sør-Korea er til dels motstridande, men ti skal ha mist livet. Minst to skal vere alvorleg skadde.

Det var taket på ein bygning ved eit feriekompleks i fjella utanfor Gyeongju, Mauna Ocean Resort , som gav etter for dei enorme snømengdene. Gyeongju ligg i den sørlege delen av Sør-Korea. Alle dei ramma er studentar ved universitetet i Busan.

Tragedien skjedde klokka 2115 lokal tid, klokka 1315 norsk tid. Avisa Korea Herald melder at ti studentar har mist livet, og at rundt 100 er lettare skadde.

Studentsamling

Ulukka skjedde under ei samling for ferske studentar ved Busan-universitetet. Det var ein konsert inne i bygningen der taket kollapsa, melder Yonhap.

Rundt 560 studentar frå Busan-universitetet si avdeling for utanlandsstudiar var inne i bygningen, melder Yonhap.

Nettstaden Busanhaps melder at det var rundt 350 studentar inne i bygningen då kollapsen skjedde. Rundt 300 greidde å kome seg ut, resten vart sperra inne av bygningsrestar og snø.

Det oppstod panikk, og mange vart skadde då dei vart trampa ned då folk prøvde å kome seg ut.

Store snømengder

Andre kjelder seier at mellom 700 og 1000 studentar var inne i bygningen då ulukka skjedde. Dei fleste kom seg ut ved eiga hjelp.

Redningsarbeidet var vanskeleg fordi det var vanskeleg å kome fram til ferieanlegget på grunn av store mengder tung snø. Det vart brukt tungt utstyr som gravemaskinar for å få bort bygningsrestane.

Området, som ligg rundt 500 meter over havet, har opplevd eit uvanleg kraftig snøfall dei siste dagane.