Politiet seier at førsteprioritet er å hindre fleire samanstøyt i nabolaget der det lenge har vore spent mellom rom og bulgararar.
Fleire etniske rom seier til nyheitsbyrået Novinite at dei vart banka opp då demonstrantar tok prøvde å ta seg forbi politisperringane og inn i heimane deira i natt.
Det er venta at bulgarske fotball-hooligans og høgreekstreme rørsler vil kome til nabolaget i kveld for å demonstrere. Opprørspolitiet har laga ein beskyttane ring rundt heimane til etniske rom.
Årsaka til krangelen var høg musikk
Ifølgje politidirektør Mladen Marinov var høg musikk årsaka til uroa. Bebuarar i nabolaget har i lengre tid klaga på at etniske rom spelte høg musikk nattetid.
Det heile kulminerte i eit slagsmål mellom ungdomsgjengar i helga, der seks personar vart skadde.
Etniske nabokranglar kjem ofte ut av kontroll
Nyleg braut det ut eit liknande masseslagsmål i den bulgarske landsbyen Garmen. Også på grunn av høg musikk.
I Bulgaria har det lenge vore eit bittert motsetnadsforhold mellom rom og bulgararar. Relativt små kranglar veks seg raskt store.
Landsomfattande hatmarsjar i 2011
I 2011 måtte rom halde ungane heime frå skulen over heile landet, etter det braut ut store anti-rom demonstrasjonar i Bulgaria.
Også denne uroa byrja med ein nabokrangel i byen Plovdiv. Ein ung bulgarar vart påkøyrd og drepen av ein lokal mafiaboss frå Romfolket.
Hatmarsjane mot denne rom-bossen spreidde seg til over 20 byar i Bulgaria. I hovudstaden Sofia stod nynazistar og vanlege middelklassefolk side om side og ropte rasistiske slagord mot romfolket.
- Vi skal koke såpe av sigøynarane, skreik mobben.
I kveld er det venta nye anti-rom demonstrasjonar. Denne gong mot speling av høg musikk nattetid.