Det vart først meldt at bilkortesjen Jafar køyrde vart angripne med propelldrivne granatar, men fleire kjelder melder at ein bil fullasta med eksplosiv køyrde inn i bilen til guvernøren.
Guvernøren i Aden, Jaafar Mohammed Saad, vart drepen saman med minst seks andre i eit angrep mot bilkortesjen hans i dag tidleg.
Foto: SALEH AL-OBEIDI / AfpIS skriv i ei meldingsteneste dei nyttar på Internett at dei står bak angrepet, og dei hevdar at åtte av livvaktene til guvernøren vart drepne i angrepet. Dei hevdar at det var ein nøye planlagt operasjon, og at det er ein del av kampen mot dei «fråfalne» i Jemen.
Mange såra
Angrepet skjedde i Tawahi-distriktet i Jemen, og eit ukjent tal menneske vart såra.
IS har trappa opp angrepa sine i Jemen etter at det braut ut borgarkrig i landet, og IS har vorte ein farleg rival til grupperinga Al Qaida på den arabiske halvøy (AQAP).
Borgarkrigen i Jemen er i hovudsak mellom den iranskstøtta Houthi-militsen og regjeringsstyrkane, støtta av Saudi-Arabia og andre land i Persiabukta. Houthi-militsen hadde i ein periode kontroll over Aden, men vart kasta ut av regjeringsstyrkane og den saudileidde koalisjonen.
Den pansra bilen til guvernøren i Adem vart fullstendig øydelagt i eit sjølvmordsangrep i Aden i dag tidleg. Guvernøren og minst seks andre vart drepne.
Foto: NASSER AWAD / Reuters
Det var ein enorm eksplosjon då bilen til guvernøren i Aden vart ramma av eit køyretøy fylt med eksplosiv.
Foto: NASSER AWAD / ReutersMaktvakuum
Onsdag denne veka tok AQAP kontroll over dei to byane Zinjbar og Jaar sør i landet. Ifølgje lokale kjelder utbyttar Al Qaida-grupperinga maktvakuumet som har oppstått i området som følgje av borgarkrigen.
I går vart ein høgare offiser i hæren og ein dommar drepne av ukjende gjerningsmenn. Dommaren har delteke i rettssaka mot militante som var delaktige i angrepet mot det amerikanske marinefartøyet USS «Cole» i Aden i 2000.
