Men i meldingane han har sendt ut via Reuters, er det ikkje verdas største seglyacht han er uroa for.
– Krigen i Ukraina er ein tragedie som må stoppast, elles blir det ei global matkrise, skriv Melnitsjenko via ein talsperson i ein e-post til Reuters.
Han er på lista over dei oligarkane som no blir råka av direkte sanksjonar.
Oligarken, som har ein formue på om lag 11 milliardar dollar ifølgje Forbes, har nemleg investert store summar i produksjon av råstoff til kunstgjødsel.
Han blir av EU-kjelder skildra som ein av dei som er i Vladimir Putin sin inste krins, saman med andre oligarkar som no er råka av sanksjonane.
Selskapet Eurochem har lenge vore ein viktig leverandør for den norske gjødselprodusenten Yara.
Russland er den største eksportøren av råstoff til kunstgjødsel i verda.
Var i Noreg
For få dagar sidan gjekk italiensk politi til aksjon på eit verft i Trieste, der Melnitsjenko sin seglyacht "A" låg i dokk.
Den 142 meter lange og 25 meter breie skuta, er verdas største motorseglbåt og blei i si tid teikna av den kjende designaren Philippe Starck.
Då "A" brått ein dag la til kai i Kristiansand i 2017, vekte det stor merksemd.
Ved å gå til ei hamn utanfor EU, ville reiarlaget få 700 millionar kroner igjen av momsen dei hadde betalt det tyske skipsverftet.
Det synte seg at Melnitsjenko låg i ein rettsstrid med verftet som bygde skipet, og skipet blei tatt i arrest i Gibraltar til rekninga var betalt.
Fødd i Kviterussland
Melnitsjenko er russisk statsborgar, men blei fødd i Kviterussland og mora er ukrainsk.
No ber han partane i krigen om å slutte fred.
– Som russar av nasjonalitet, kviterussar av fødsel og ukrainar av blod kjenner eg stor smerte og vantru når eg er vitne til broderlege folk som kjempar og døyr, seier han til Reuters.
Melnitsjenko sine selskap har om lag 100.000 tilsette.
Selskapa har investert for om lag 23 milliardar dollar i gjødsel- og kolproduksjon dei siste 15 åra, skriv Forbes.
Fryktar høge matvareprisar
Russland og Ukraina er blant dei viktigaste produsentane av landbruksvarer i verda.
Dei eksporterer meir enn dei importerer, særleg gjeld dette kveite, mais, raps, solsikkefrø og matolje.
FN sin organisasjon for mat og landbruk (FAO), har analysert situasjonen. Dei fryktar at prisane på mat og dyrefor vil auke med 8 til 22 prosent.
Det kjem i tillegg til den auken ein alt har sett på mat, særleg i Europa.