Fem bomber gjekk av rett etter kvarandre. Også ein politimann vart drepen, og over 20 menneske er såra.
Målet for bombene var ein konvoi med politikøyretøy som køyrde gjennom byen, men som vanleg ved slike angrep var dei fleste offera sivile.
Ein talsmann for dei lokale styresmaktene seier til nyheitsbyrået AFP at bombene var plasserte ved vegen i eit travelt gatekryss i den sørlege bydelen Dura-e-Panjwayi, rundt fem kilometer frå sentrum av Kandahar.
Folk som strøymde til etter den første eksplosjonen, vart offer for dei seinare eksplosjonane. Lokale radio- og fjernsynskanalar gjekk ut med oppmoding om til folk om å gi blod, og mange melde seg ved dei ulike sjukehusa.
Politiet seier at angrepet er utført av «fiendar av Afghanistan», eit uttrykk som blir brukt om Taliban.
Også i går var det bombeangrep i den strategisk viktige byen Kandahar, som tidlegare var hovudmaktbasen for Taliban. Då vart fire menneske drepne og 11 såra i eit angrep mot ein politikonvoi i Kandahar. Også då var dei fleste offera sivile.