Politiet vil ha tak i denne mannen etter terroraksjonen i Moskva

Mannen skal vere observert i ankomsthallen i minst eit kvarter før bomba gjekk av på Domededodvo-flyplassen.

35 personar vart drepne og 180 skadde i terrorangrepet . No vil russisk politi ha tak i 32 år gamle Vitaly Razdobudko, og etterlyser han.

Dei peikar også på ni andre som mogleg mistenkte, ifølgje nyhetisbyrået AP.

Myndigheitene forsiktige

Mannen som sprengde seg i lufta skal ha vandra rundt saman med dei som venta i ankosthallen, og heile tida hatt venstre hand planta i lomma. Så skal han ha ropt «eg skal drepe dykk alle!» og detonert bomba midt blant folk.

Russiske myndigheiter har vore forsiktige med å gå ut med informasjon rundt etterforskinga. Seinast i går sa statsminister Vladimir Putin at han ikkje trudde at dei som stod bak angrepet kom frå Tsjetsjenia .

I dag melder AP at politiet har ti namn på personar frå Kaukasus-området som dei vil sjekke ut. Politiet mistenkjer at Razdobudko er medlem i terrorgruppa Nogai Jamaat, ei terroristgruppe som opererer sør i Russland.

Mistanke mot Kaukasus

Ifølgje The Telegraph er mannen ein etnisk russar som har konvertert til islam. Dei ni andre som politiet undersøkjer, skal også vere kopla til denne gruppa.

Så langt har ingen teke på seg ansvaret for angrepet, men ifølgje provinsleiaren i Ingusjetia, Janus-Bek Jevkurov, var det ei islamistisk undergrunnsgruppe i Nord-Kaukasus som stod bak.

– Det er leiarane av undergrunnsrørsla i Nord-Kaukasus som er ansvarlege, seier han til journalistar i hovudstaden Magas, og nemner spesielt Doku Umarov, melder nyheitsbyrået Reuters.

Umarov brukar å kalle seg emir av Emiratet Kaukasus.

• Les også: - Vil få meir terror i Russland
• Les også: Medvedev: – Skal jages og straffes