Politiet fekk ei bekymringsmelding i 13-tida laurdag. Då dei kom fram til adressa i Trondheim, fann dei ein død person. Den avdøde er ei kvinne i 80-åra.
– På bakgrunn av funn på staden vart dødsfallet sett på som mistenkeleg, og vi sette i gang etterforsking, seier politiadvokat Ole Andreas Aftret.
Dottera sikta
Laurdag blei dottera til avdøde, ei kvinne i 50-åra, pågripen. Ho er sikta for å ha forlate mora i hjelpelaus tilstand. Søndag blei ho lauslaten.
– Bakgrunnen for dette er at politiet vurderer at det ikkje er fare for tap av bevis i saka, og at det dermed ikkje er grunnlag for vidare fengsling, seier Aftret.
Det er advokat Kolbjørn Lium som er forsvararen hennar.
– Det er ikkje ønskeleg å gå noko nærare inn på innhaldet i avhøyret utover at klienten min nektar straffskuld, skriv han i ei tekstmelding til NRK.
Politiet undersøker om det har skjedd noko kriminelt i saka, eller om dødsfallet var naturleg.
Foto: Bjarte Johannesen / NRKBlir obdusert måndag
Aftret presiserer at den sikta ikkje er mistenkt for å ha forårsaka dødsfallet.
– Siktinga dreier seg om ikkje å ha gitt naudsynt hjelp til den som var i hjelpelaus tilstand, seier han.
Det vil bli gjennomført obduksjon av avdøde måndag for å fastslå kva dødsårsaka er.
– Før obduksjonen er gjennomført er det ikkje grunnlag for å seie noko om dødsfallet kjem av ei straffbar handling eller ikkje, seier han.
Politiet ønsker ikkje å gi ytterlegare informasjon i saka søndag. Dei etterforskar breitt og jobbar med fleire etterforskingssteg for å klarlegge omstenda rundt dødsfallet.
Fleire politipatruljar gjorde undersøkingar ved ei adresse på Saupstad i Trondheim laurdag.
Foto: Bertil Lernæs
