Moro med synleg reparasjon

Hopp til innhold

Når reparasjonen skal vere synleg, kan du boltre deg i kreative løysingar. Den profilerte syaren Eva Kittelsen, blant anna kjend frå Symesterskapet på NRK, har spesialisert seg på dette.

– Eg synest det er kjempeviktig å reparere i staden for å kjøpe nytt, det er ein soleklar måte å få ned forbruk og forureining på, seier Eva.

Sjå lesarane sine eigne reparasjonar her:

Ho er blant anna inspirert av den japanske teknikken Kintsugi, som går ut på å reparere keramikk og porselen ved å blande gullstøv i limstoffet.

Tingen blir dermed meir verdt etter reparasjonen enn då den var ny.

– Eg overfører denne teknikken til reparasjon av klede ved å bruke gulltråd og gullfarga tekstilmåling, fortel Eva.

Her er hennar fem tips til synleg reparasjon:

1: Lag eit kunstverk

Sy eit motiv som er større enn det du vil reparere. Fest ein tøybit bak holet, og sy småsting på kryss og tvers i eit mønster som veks utover.

2: Bruk friske fargar

Sy eit valfritt motiv over holet, gjerne med friske og kontrastrike fargar. Om du gjentar motivet fleire stader, får det større effekt.

3: Kopiér eit mønster

Har du eit fint mønster du vil bruke, kan du overføre det til stoffet ditt ved hjelp av karbonpapir, då får du eit fint avtrykk å sy etter.

4: Kult med måling

Bruk måling for å oppnå kule effektar, og hindre sårkantar frå å rakne. Her er det berre å boltre seg i fargar, kvifor ikkje gå for gull?

5: Triks for fine saumar

Med hjelpemiddel som ei broderiramme eller ein stoppevevar får du lettare fine saumar og lekre vevingar over flekkar og hol.

Få fleire tips, og sjå korleis Eva gjer, det i denne videoen:

Sjå alt frå Symesterskapet i NRK TV her!

Balsam for sjela

For Eva Kittelsen er det balsam for sjela – eller «soul mending», som ho seier – å bøte på flekkar og hol. Ho ser ein tydeleg likskap mellom det å vise omsorg for slitne klede og å vise omsorg for slitne menneske.

– Det er så mykje symbolikk i det å reparere tøy, å ta vare på noko som har blitt øydelagt. Frå å verke ubrukeleg, kan det bli endå sterkare og finare. Sånn er det også med oss menneske, seier ho.

Les òg: Motemysteriet

Auka verdi

Ho framhevar at vi brukar tid og pengar på det vi reparerer, og at det dermed får ein auka verdi. Men det er ikkje likegyldig kva metode vi brukar. Den må tilpassast situasjonen.

– Om du prøvar å reparere tynn silke med tjukke stoff, og silken raknar, så betyr ikkje det at silken ikkje var verdt noko. Det var berre feil type reparasjon, seier Eva.

Ho reagerer på dagens sterke fokus på eit perfekt ytre, og at du må nå ein viss standard for å ha ein verdi i samfunnet.

– For kvar reparasjon og sting eg tar, blir eg sakte, men sikkert bevisst at det ikkje må vere slik. Det som viser teikn på slitasje, har ikkje mindre rett på kjærleik og omsorg. Tvert om, det treng faktisk litt ekstra, slår ho fast.