VM-anlegga i Qatar: Må jobbe i 53 varmegrader

Først når termometeret bikkar 54 grader slepp arbeidarane i Qatar å gjere utandørs byggearbeid.

– Det er nok i meste laget sjølv for folk som er akklimatisert for varme, seier Harry Eide.

Han er verneombod, og har vore i Qatar saman med Geir Kåre Wollum i ein delegasjon frå det internasjonale bygningsarbeidarforbundet BIW for å granske tilhøva for arbeidarane.

I ein rapport frå organisasjonen Human Rights Watch for eit par veker sidan blir arbeidet i varmen kritisert. Det kan bli langt over 50 grader midt på dagen i Qatar. På den eller varmaste tida i sommar fekk dei innvilga tre timar pause midt på dagen, men det er ikkje nok, meiner HRW.

Flaggsystem for jobbing i varme

Det er dei norske inspektørane langt på veg samde i.

– Dei har utvikla eit system med grøne, gule, oransje og raude flagg som skal vise kor farleg det er å arbeide. Ved raudt flagg er utandørs arbeid forbode, men det blir ikkje vist før temperaturen er 54 grader.

• Grønt flagg, inntil 31 grader: Arbeid som vanleg, men drikk vatn ofte
• Gult flagg, 32-38 grader: Hyppige kvilepausar og drikkepausar
• Oransje flagg, 39-53 grader: Arbeidspausar, svært ofte ved fysisk krevjande arbeid
• Raudt flagg, 54 grader og over: Stopp alt arbeid og trekk arbeidarane vekk frå varmen

Positivt overraska

Men elles var utsendingane positivt overraska over mykje av det dei såg på dei to VM-anlegga dei inspiserte.

– Kan det vere slik at tryggingstilhøva blir litt slakkare etter at inspektørane har reist og søkelyset er borte?

– Nei, vi har god grunn til å tru at den praksisen vi såg, er der også etterpå, seier Geir Kåre Wollum.

– Det kan ikkje vere tvil om at det internasjonale søkelyset som er sett på arbeidstilhøva ved bygginga av VM-anlegga har gitt resultat, seier Eide, som også hadde følgje av Geir Kåre Wollum frå Norsk Arbeidsmannsforbund til Qatar.

For det er ved VM-anlegga forholda er akseptable, ikkje i landet elles, meiner Eide.

– Vi køyrde frå sentrum av Doha og ut til to av anlegga. Det vi såg frå bilvindauga langs vegen, var ikkje bra. Eg har inspisert nokre anlegg i mitt liv, og er ikkje i tvil om at eg hadde stengt på dagen dei vi såg på vegen ut til stadion-anlegga, seier Eide.

Opp mot 90 prosent utanlandske arbeidarar, og rapportar om arbeidsforholda deira har vekt kritikk og avsky over heile verda. Men Eide strekar under at løns- og butilhøva ikkje var det dei granska.

– Vår oppgåve var å sjekke miljø og tryggingsforhold på sjølve arbeidsplassane. Og eg må vedgå at ut frå den kritikken vi har høyrt og lese, var vi overraska over at det stod så godt til, seier Eide.

VM i 2022 er flytta frå det tradisjonelle tidsrommet i juni/juli til november desember på grunn av den ekstreme varmen i Qatar.