– Det var eit viktig poeng, me skulle vunne kampen, men eit poeng skal me klare å leve med, seier Vålerenga-trenar Kjetil Rekdal til NRK etter kampen.
Etter ein dårleg sesongopning har Vålerenga vist god form den siste tida. På dei siste seks kampane i eliteserien har dei vunne fire, og sanka totalt 14 poeng.
Det har ført dei til 10. plass på tabellen, etter å lenge ha vore under nedrykksstreken. I dag vart det 1-1 og uavgjort heime mot Bodø/Glimt, sjølv om alle poenga kunne blitt igjen i Oslo.
Overkøyring
I førsteomgang var Vålerenga heilt overlegne. Etter fem rotete opningsminuttar tok dei over alt som var av spel, og skapte mange gode sjansar.
Etter snaue halvtimen spel blei dei også snytt for straffe, då Vålerengas Kjetil Wæhler blei felt av Glimt-forsvarar Martin Bjørnbak.
– Det var eit soleklart straffespark som hadde gitt oss 1-0, seier Rekdal.
Men Vålerenga fortsette å dominere kampen, heilt til Bodø/Glimt fekk sin første store sjanse i det 43. minutt. Glimt kontrar, og slo ballen langt opp til Trond Olsen, som legg inn. Der sklir Fitim Azemi ballen inn i nettmaskene.
JUBEL: Bodø/Glimt kunne juble etter å ha skåra på sin einaste sjanse i 1. omgang.
Foto: Grøtt, Vegard Wivestad / NTB scanpixDet var ein tydeleg irritert Vålerenga-trenar Kjetil Rekdal som gjekk i garderoben.
Praktmål
Og då laga kom ut på bana igjen hadde Rekdal teke grep. Vajeba Sakor var bytta ut mot Henrik Kjelsrud Johansen, som skulle inn for å skape meir trykk framover for Vålerenga.
Men det var ein fantastisk enkeltprestasjon som sendte laga attende til start. For Simen Juklerød fekk nok ein gang vise fram den giftige venstrefoten sin. 22-åringen tok ned ballen 25 meter frå mål, såg opp, og limte ballen i krysset bak ein hjelpeslaus Sergey Pogorelyj i Glimt-målet.
– Eg fekk beskjed om å skyte, og so traff eg ganske bra. Eg er fornøgd med det valget, seier Juklerød.
Vålerenga var mindre dominerande enn før pause, og sleit med å sette preg på spelet. Begge lag hadde gode sjansar til å skåre, men kampen enda 1-1.
– Me skapar like mange store sjansar som dei, og gjer vår jobb i 90 minuttar. Målet deira er ikkje so mykje å gjere med, seier Bodø/Glimt-trenar Aasmund Bjørkan til NRK.
