To ekstra kvinnehopprenn under Raw
På grunn av dei mange avlyste renna tidlegare i vinter, blir det fleire sjansar for dei kvinnelege hopparane, dersom smitteverntiltaka gir rom for det.
Dei to ekstra renna blir i Holmenkollen laurdag 13. mars, og på Lillehammer måndag 15. mars. Desse kjem i tillegg til dei tidlegare oppsette Raw Air-renna.
Det seier generalsekretær Ingvild Bretten Berg i Norges Skiforbund til NRK. Forbundet fekk det stadfesta av FIS tysdag.
– Det er fleire renn som har blitt avlyst i vinter. Mellom anna det som skulle gått på Lillehammer komande helg, og som vi dessverre måtte avlyse på grunn av smitteverntiltaka, seier Berg.
Berg legg til at også renna i Raw Air er avhengig av at smitteverntiltaka gjer det mogeleg å avvikle.
– Vi har tett kontakt med styresmaktene, seier ho.
Dermed blir det fem hopprenn for kvinner under Raw Air. To i Holmenkollen, to på Lillehammer, og finalen i Trondheim 18. mars.