16-åringen frå Sverige er tidlegare omtalt som «det største langrennstalentet i verda», og får Petter Northug til å komme med sjeldan svenske-ros.
– Det er eit bra talent som Sverige har her. Han kan bli ein juvel, seier Northug til NRK.
Frå å vere ein fast rival i dei store meisterskapa er Sverige meir som ein parentes å rekne på herresida i langrenn. VM i 2015 var sist landet tok ein individuell medalje i eit meisterskap.
Det kan Myhlback få ein slutt på. Ifølgje Expressen har han trena med det russiske landslaget, og parkerte Calle Halfvarsson på i ein løpstest i fjor. I januar stilte han opp på Orsa skimaraton og vann, men sidan han berre var 15 år vart han fråteken sigeren.
– Stor respekt
Då skjønte ein for alvor at Alvar Myhlback, som har budd fire år i Noreg, kunne bli den neste store.
– Det er kult. Eg kjenner ikkje på presset, det er kult at folk trur på meg, seier Myhlback til NRK.
16-åringen har i sommar konkurrert mot dei norske landslagsutøvarane på Blinkfestivalen, og måndag møtte han dei norske stjernene i rulleskisprinten på Trysil.
IMPONERT: Petter Northug, her avbilda i samband med Rosenborg-Aalesund sist søndag.
Foto: Svein Ove Ekornesvåg / NTB– Han verkar veldig solid, han har gått veldig solid på rulleskirenn. Eg snakka med Even Northug, og han sa at han gav han skikkeleg kamp på oppløpet, fortel Petter Northug.
Rosen frå sjølvaste Northug betyr mykje for svensken.
– Eg har stor respekt for han, seier Alvar Myhlback til NRK.
Stjernemøte med Northug
Til vinteren blir junior-VM det store målet. Han er ein del av det svenske langløpslaget Lager 157, og håpar også å bite frå seg i Ski Classics til vinteren.
Der vil han truleg måle krefter med Petter Northug, som også skal gå ein del Ski Classics-renn den komande sesongen.
Dei to møttest på rulleskisprinten i Trysil denne veka, der Pål Trøan Aune vann føre Even Northug og Petter Northug. Myhlback vart nummer seks.
Til vinteren blir forventningane skrudd opp.
– Eg håpar at eg kan levere til dei forventningane. Det er ikkje noko press eg kjenner, det er meir mål.
Og då får Northug kanskje nokre svenskestikk i retur.
– Det hadde vore kult å gi litt kommentarar til Petter viss eg hadde slått han, seier Myhlback.
