– Det har vore ein veldig kul dag i livet mitt.
Det seier ein smilande Nicolai Budkov Kjær til NRK etter å ha gjennomført ei intens treningsøkt med tennisstjerna Andrej Rubljov. Russaren er på plass i Oslo i samband med turneringa «Ultimate Tennis Showdown», der stjerner som Casper Ruud, Holger Rune og Rubljov sjølv deltar.
Tenniseliten har vore på Telenor Arena på Fornebu for å førebu seg til turneringa. Og det er her Kjær kjem inn. På kort varsel fekk han spørsmål frå verdsfemmaren Rubljov om han kunne komme og trene med han.
– Eg frigjer mykje plass i kalenderen for moglegheita til å spele med desse som er utruleg gode, seier Kjær, som i tillegg til Rubljov, også fekk spele med tidlegare Grand Slam-vinnar Dominic Thiem.
Rubljov: – Har det som skal til
Det kjem godt med for ein 17-åring som har begynt å gjere seg merka i tennisverda.
– Det er utruleg motiverande. Eg er fornøgd med å ha høve til å trene med så gode spelarar. Tennis er ein idrett det er vanskeleg å måle, du kan ikkje måle sånn som i springing. Då må ein måle mot dei beste i verda og det var det eg fekk moglegheita til, seier Kjær, som merke at desse øktene er noko heilt eige:
– Dei speler utruleg godt, og det er det som er forskjellen: Dei speler godt over utruleg lang tid. Ein kjenner berre kvalitet i kvart slag.
Rubljov, som er rangert som nummer fem i verda og som nyleg tok seg til kvartfinalen i Australian Open, lét seg imponere av sin ni år yngre treningsmakker.
– Det er vanskeleg å seie sidan han framleis er junior, men han har eit fantastisk slag, bra høgde og det som skal til for å bli ein stor tennisspelar. Treninga med han var kjempebra, han jobba hardt og spelte veldig bra. Han var respektfull og er ein fin gut, seier Rubljov.
Han har trua på ei lys framtid for Kjær, som i januar leverte sitt beste resultat så langt i karrieren. Han enda på tredjeplass i juniorutgåva av Australian Open.
– Det er mange der ute som er betre enn meg, men det er hyggeleg at han liker korleis eg speler og kanskje liker korleis eg er òg, seier Kjær.
Trenar med stjernene
Kjær er rangert som nummer fire på juniorrankinga, og fekk i fjor haust Noreg-debuten i Davis Cup. Han har allereie hausta mykje erfaring for ein 17-åring, og Rubljov er langt frå den einaste stjerna han har trena med.
Han har sparra mykje med Casper Ruud, og medan han var i Australia trena han med Daniil Medvedev (nummer tre på verdsrankinga) og Jannik Sinner, som vann Australian Open og er nummer fire på verdsrankinga.
Han har også trena med Holger Rune.
Dansken seier til NRK at han hugsar økta med Kjær, som fann stad i Monte Carlo.
– Han er ein stor spelar. Det er vanskeleg å verkeleg vite når du berre står og slår med nokon, for det er mange som har god timing, men han er ung og har gode slag. Han pressa hardt i dei treningane vi hadde. Han har forhåpentlegvis ei lys framtid, men han har framleis ein lang veg å gå, seier Rune, som er rangert som nummer sju i verda.
– Speler aggressiv tennis
Ein annan som har late seg imponere av Kjær er landsmann Casper Ruud. Den norske tennisstjerna synest det er stas at ein ny nordmann er på veg opp og fram i tennis.
– Han er ein tøff kar med høge ambisjonar og mål. Han har absolutt spelet og potensialet til å nå veldig langt, seier Ruud til NRK.
Ruud, akkurat no rangert som nummer tolv i verda, meiner Kjær har teke store steg det siste året, og undervurderer ikkje betydninga av å få treningsøkter med spelarar som Rubljov.
– Nicolai liker å spele hardt og slå aggressivt på ball. Eg speler kanskje ein litt annan type tennis, så han lærer nok meir av å spele med Andrej enn med meg, seier Ruud og ler.
Ruud veit ein ting eller to om det å trene med verdas beste. Han flytta blant anna til Mallorca for å trene med superstjerna og barndomsidolet Rafael Nadal.
Men han er klar på at det er noko heilt anna når Kjær etter kvart skal over på senior- og proffnivå.
– Det har vore juniorar som har vore superstjerner og ikkje har fått det til på senior og motsett. Det blir veldig spennande å sjå, seier Ruud.
Ingen lykkeamulett
Også treningsmakker Rubljov er spent på Kjærs framtid, og meiner korleis han angrip detaljane kjem til å vere avgjerande.
– Han har det som skal til, så spørst det korleis han jobbar for det. Det er mange juniorar som har vore store talent, men som seinare ikkje vil gjere jobben, seier Rubljov, og understrekar:
– Han har bra høgde og gode slag, så spørst det om han bruker desse tinga på rett måte.
Første gongen dei to trena saman, i Monte Carlo, enda Rubljov opp med å vinne turneringa Monte Carlo Masters. Skulle Rubljov herje på Fornebu denne helga, vil Kjær kanskje peike ut seg som ein lykkeamulett for russaren.
– Det håpar eg ikkje. Da må han ta meg med på mange turneringar. Eg har min eigen karriere å ta vare på, så eg får håpe det er andre ting som gir han flaks, smiler Kjær.