Større enn sommar-OL

Dragebåt-race, sjakk, rulleskøyter, cricket og ulike typer av dansesport er berre nokre av øvingane som det vart konkurrert i i dei nyleg avslutta Asia-leikane. I tillegg til dei meir kjende idrettane som fotball, friidrett, symjing, turn, osv.

• Les: Alle idrettane i Asialeikane

Asialeikane vart i år arrangert for 16. gong sidan starten i 1951. Sidan 1954 har leikane blitt arrangert kvart fjerde år, midt mellom sommar-OL. Årets leikar gjekk av stabelen i Guangzhou i Kina.

Dei neste leikane skal arrangerast i Incheon i Sør-Korea i 2014.

Best games ever?

- Årets leikar har utan tvil vore mellom dei aller beste i leikane si historie, sa presidenten i Asias Olympiske Komité, sjeik Ahmed Al Fahad Al Sabah under avslutninga laurdag.

Som vanleg vart Kina klart beste nasjon. Dei tok 199 gull, 119 sølv og 98 bronse - totalt 416 medaljar i løpet av dei 15 dagane leikane varte.

• Les: Kina tok sitt gull nr 1000

Sør-Korea tok 76 gull, Japan 48 og Iran 20. 45 land deltok.

- Men vi manglar topp standard i fleire greiner. Dette er ikkje godt nok med tanke på OL i London i 2012, sa Kinas lagleiar Duan Sijie.

- For oss er dette smertefullt. Men det er der vi er no, og det må vi våge å vedgå, sa Japans sjef Noriyuki Ichihara etter den skuffande japanske medaljefangsten. 48 av 476 gull er langt under det Japan hadde rekna med.

Og India? Dei opna svakt, men kom opp i ni gull og fem sølv til slutt.

Eksotisk og gigantisk program

Kabaddi, sepaktakraw og wushu er også idrettar som står på det omfattende programmet - idrettar som for dei fleste av oss verkar svært så eksotiske.

Ikkje mindre enn 476 øvingar står på programmet. Til samanlikning har det som vanlegvis er rekna som det største idrettsarrangementet i verda - sommar-OL - "berre" 302.

Det betyr at Asia-leikane er meir enn 50 prosent større enn OL, målt i talet på øvingar, og dermed talet på utdelte gullmedaljar.

Sjakk og biljard

Biljard-sport har eksistert på programmet sidan 1998. Det blir konkurrert i fire greioner: Biljard, carom, pool og snooker.

Sjakk er ikkje berre sjakk i Asialeikane. Det er også weiqi og xiangqi . Sjakk vart lansert i Asialeikane i 2006. Fire sjakk-gull vart delt ut i år, tre gjekk til Kina, men Rusta Kasimdzhanov tok gullet i den individuelle klassen for menn.

Dans var i år med for første gong. Ti øvingar stod på programmet, og Kina tok alle ti gullmedaljane.

Hovud, hale og trommis

Mange av idrettane er langt på veg ukjende i den vesteuropeiske del av verda. Men i Asia er dei store og tradisjonelle:

Dragebåt-roing har 2200 års tradisjon i Kina. Idretten oppstod til minne om Qu Yan som drukna seg i Milo-elva i protest mot det korrupte regimet i landet. Kravet til konkurransebåtane er at dei er utstyrt med hovud og hale i dragestil, i tillegg til styrearm og styreåre. Blant mannskapet skal det vere ein trommeslagar i tillegg til dei 20 padlarane.

Kina og Indonesia delte likt dei 6 gullmedaljane i denne idretten.

Kabaddi er ein kampsport for lag. Kvart lag har sju deltakarar, som har som oppgåve å kome over på motstandarens sin banehalvdel og kome i kontakt med så mange motstandarar som mogeleg. Kvar kamp har to omgangar på 20 minutt med fem minutts pause imellom. Idretten har vore på programmet i Asialeikane sidan 1990.

Rulleskøyteløp er ein parallell til skøyteløp i vinter-OL. Det vil seie at det blir konkurrert i både kunstløp og hurtigløp, men altså på skøyter med hjul. Det har ikkje stått på programmet før i år. Totalt var det 9 øvingar i denne sporten - tre i kunstløp og seks i hurtigløp.

Sepaktakraw er ein tradisjonell idrett frå Malaysia og Indonesia, og har stått på programmet sidan 1990. To lag står på kvar si side av eit nett og skal få ballen over nettet og i bakken på motsett banehalvdel. Til dette kan dei bruke alle kroppsdeler som helst, bortsett frå hendene. Det er to eller tre spelarar på kvart lag.

Wushu er samanfatning av tradisjonell kinesisk kampsport, og omfattar ei rekke disiplinar. 15 gullmedaljart vart det delt ut i Wushu, og Kina tok ni av dei.