Spissjuvelen til AaFK er ikkje uroa over høge forventningar

Med to tolkar troppa Abderrazak Hamdallah opp på Color Line Stadion måndag. Administrerande direktør og pressesjef i AaFK følgde framfor og bakom.

22-åringen frå Marokko kosta AaFK nærmare éin million euro, eller over sju millionar norske kroner.

Han blei kjøpt frå den marokkanske klubben Safi i februar.

Søndag landa han i Ålesund. Måndag bestod han alle dei medisinske testane.

– Eg takkar for tilliten

Spelaren sjølv omtalar seg som allsidig, god i bakrom og som ein god avsluttar. Han skal ha vere glimrande teknisk og ha god fysikk.

– Han vil passe godt inn i norsk fotball. No veit eg at han er sugen på å få kome seg ut på treningsfeltet i morgon, seier AaFK-trenar Jan Jönsson.

Hamdallah er den dyraste spelaren dei oransje og blå nokon gong har kjøpt. Forventningane er enorme, noko spelaren sjølv lev godt med.

– Eg håper å tilfredsstille det behovet Aalesund har. Eg takkar for tilliten, og gler meg veldig til å kome i gong, seier 22-åringen til NRK.

– Eg er ikkje uroa over forventningane til meg, og eg tek utfordringa på strak arm.

Kan få debuten allereie måndag

I dag, måndag, formiddag blei klart at kampen mellom Sandnes Ulf og AaFK skal spelast.

Trenar Jönsson fortel at debuten fort kjem då.

– Han skal vere kampklar, så får vi sjå kor mykje speletid det blir. Kvalitetane er derimot så store at han skal vere veldig aktuell allereie måndag mot Sandnes Ulf.

AaFK sin svenske trenar er derimot klar på at han skal få tid på seg, trass i den svimlande prislappen.

– Det er «skjønt» at han endeleg er på plass, og det aukar konkurransen. Men han skal få tid, sjølvsagt.

– Likevel trur eg det er såpass stor klasse over han at han vil konkurrere om ein plass allereie måndag, seier Jönsson til NRK.

Rett på engelskkurs

Spelaren sjølv er veldig klar for å opne scoringskontoen i AaFK. Å prestere er derimot berre éi utfordring 22-åringen frå Marokko møter.

Hamdallah pratar knapt engelsk, sjølvsagt ikkje norsk, og skal inn i eit lag med svensk trenar, mange norske dialektar og ulike nasjonalitetar.

– Det er sjølvsagt ei utfordring, men eg vil lære meg språket raskt, slik at kommunikasjonen kan bli god, seier marokkanaren.

– Det skal gå med fotballspråk. Men han skal på skulebenken å lære seg engelsk, så dette skal gå bra, fortel trenar Jönsson.

– Han pratar arabisk og fransk, og vi har éin spelar som pratar fransk. Vi har opplevd dette før, då Barrantes kom utan å kunne eitt ord engelsk. Desse gutta pratar med føtene, gliser Henrik Hoff.

Saka held fram under bildet.

– Køyrer opp forventningane sjølv

Medan trenar Jönsson kom til AaFK i januar, har spissleitinga pågått i mange år.

Administrerande direktør Hoff har vore med gjennom heile prosessen, med presseskriveri og feilslått leiting.

– Media har hausa ekstra opp dette med spissen, men vi er nok delvis skuld i det sjølve. Vi har ikkje fått tak i den typen vi leita etter, men no er han på plass.

– Det er den mest kostbare overgangen i AaFK-historia, og forventningane er heller store til denne spissen. Veit han om desse forventningane sjølv?

– Ja, og han er faktisk med på å køyre opp forventningane sjølv.

– Han er klar på at han vil ta steget vidare etter kvart, og er svært lysten på å prestere i Tippeligaen. Forventningane er han veldig førebudd på, slår Hoff fast.

Og spissen sjølv, han vil til ...

– Eg håper å få spele i ein av dei største ligaene etter kvart.

– Og draumeklubben er?

– Draumen min er å spele for Manchester City, avsluttar Abderrazak Hamdallah.