Skrekkskade for svensk boksar: – Aldri sett liknande

Det vart reine blodbadet i oppgjeret mellom den svenske boksaren Badou Jack og Marcus Browne i Las Vegas. NRK sin boksekspert meiner kampen burde vore stoppa.

BOXING/

KRAFTIG KUTT: Kuttet er noko av det verste NRK sin bokseekspert Anders Werner Øfsti har sett.

Foto: Joe Camporeale / Reuters

– Eg har aldri sett liknande i ein boksering, seier NRK-ekspert Anders Werner Øfsti.

Det var i den sjuande runden under tittelkampen i lett tungvekt at amerikanaren sin skalle trefte Jack i panna, ifølgje SVT.

– Kraftlaus

Resultatet vart eit kutt som strakk seg frå nasen og langt opp i panna. Men kampen heldt fram og Jack boksa vidare i fem rundar med blodet fossande ned frå panna. Deretter bar det rett til sjukehus for svensken.

– Kampen burde absolutt vore stoppa, fordi når du får eit så stygt kutt, så skal du ikkje gå vidare, meiner Øfsti.

Boxing: Jack vs Browne

TIL SJUKEHUS: Badou Jack.

Foto: Joe Camporeale / Reuters

– Eg var kraftlaus. Eg veit ikkje kva det var. Men ingen unnskyldningar, Browne boksa bra, sa Jack til Showtime og reiste av garde til sjukehus direkte etter kampen for å sy i hop såret som gjekk fleire centimeter rett over panna.

Vil ha ny kamp

Øfsti er kritisk til at verken legen eller trenarane stoppa kampen.

– Han har jo ei kjempediger flenge i panna. Det ser nesten ut som eit krater, og når ingen går inn og stoppar kampen, så skal du ikkje sjå vekk ifrå at dette kan få eit etterspel.

Badou sjølv ser derimot framover.

– Eg vil ha ein omkamp. Eg må kvile no og få fiksa hovudet mitt, og så er det forhåpentlegvis ein sjanse i framtida, seier svensken.

Søndag ettermiddag har den svenske proffboksaren sjølv lagt ut ein bilete på sin eigen Instagram, der han takkar fansen for all støtta han har fått. Kuttet er no sydd, men arret vil nok minne han om denne kampen ei stund til.

Siste nytt

  • Inter framleis utan poengtap

    Inter tok sin fjerde siger av fire mogelege med 2-0 mot byrival Milan. Marcelo Brozovic og Romelu Lukaku scora i andre omgang. Det er Lukakus tredje mål i Serie A etter overgangen frå Manchester United.

    Inter leier framfor Juventus, som slo Hellas Verona 2-1. Milan er nummer 9.

    Romelu Lukaku
    Foto: Marco Bertorello / AFP
  • Fortvilar etter nytt Barcelona-tap

    Barcelona gjekk på sitt andre tap på dei første fem rundane då Granada vann 2-0 laurdag kveld. Ramon Azez scora etter to minutt, og Alvaro Vadillo dobla på straffe etter 66 minutt.

    Barcelona starta utan Lionel Messi, som kom inn frå start i andre omgang.

    Lionel Messi
    Foto: Marcelo Del Pozo / Reuters
  • Mållaust i Bergen

    Brann hadde ballen klart mest i Bergen mot Haugesund, men det enda med 0-0 framfor 10.000 nokså misnøgde bergensarar.

    Brann hadde klart overtak før pause, men Haugesund var betre med i andre omgang.

    – Siger til oss i dag hadde vore eit ran, sa Haugesunds trenar Jostein Grindhaug til Eurosport.

    – Vi var overraskande bra før pause, og burde hatt mål. Etter pause får vi ikkje i stand same trykketMen vi har eit nykomponert lag og blei slitne mot slutten, seier Brann-trenar Lars Arne Nilsen til NRK.

    Nilsen snakka med supporterane etter kampen.

    – Eg trur dei forstår at vi har det vanskeleg. Vi må tenkje nytt og mobilisere det vi har. Vi skulle hatt fleire tilgjengelege, men med 5-6 ute er det vanskeleg.

    – Høyrde du ikkje pipinga då de gjekk av bana?

    – Eg er tunghøyrd. Men eg trur publikum forstår at spelarane blødde for drakta og gjorde det dei kunne i dag. Det er frustrerande å ikkje vinne, seier Nilsen, som skal ta laget sitt til Rosenborg på Lerkendal neste helg.

    Lars Arne Nilsen
    Foto: Marit Hommedal / NTB scanpix

Sendeplan

Kl. Program Kanal