Sjå Ruud-detaljen som overraska faren – har aldri gjort det før

– Eg blei litt overraska sjølv, fortel far og trener Christian Ruud til NRK.

Det såg lenge tøft ut for sonen da heimehåpet Diego Schwartzman tok første stikk i ein thriller av ein finale. Men Ruud slo knusande tilbake i solsteika med 6-2 i andre og 6-3 i tredje sett som sikra nok eit trofé i samlinga.

For observante tenniselskare var det også ein detalj som den norske stjerna aldri har gjort før. Ruud slo nemleg ein knallhard serve i retning sin argentinske motstandar.

Hastighetsmålerne viste heile 230 kilometer i timen.

– Eg trur han har vore oppe i kanskje 220 tidlegare. Så nei, han har aldri serva så hardt før, seier Christian Ruud.

Betre enn Djokovic og Nadal

Hastigheten er betre enn mellom anna storspillerene Novak Djokovic og Rafael Nadal som har høgaste på 219 og 217 kilometer i timen. Men å slå server som går i såpass høg hastigheit har ikkje vore eit spesielt mål.

– Vi jobbar med småtekniske ting i «off season» og han jobbar jo med å bli sterkare og køyrer styrke heile tida, så han blir litt og litt sterkare for kvar dag.

Før trenaren og den tidlegare tennisspelaren legger til eit men:

– Casper klarer ikkje å serve så hardt heile tida. Det blir slitsamt. Men det er gøy at det går riktig veg.

Ruud har spesielt jobba med tre element det siste året: spin, backhand og serve. At sistnemnde har blitt med høg hastigheit er ikkje nødvendigvis det viktigaste, men i kombinasjon med presisjon blir det «dødeleg» effektivt.

Øivind Sørvald bidrar med tekniske og taktiske analysar for team Ruud, og blir engasjert da Ruuds serve blir eit tema.

Blir skremt av Ruud

– Når du gjør alt teknisk riktig og bruker hele kroppen som Casper gjorde der, kan du få forrykande hastigheiter, seier Sørvald til NRK.

For ein ting er å serve hardt. Men å serve hardt med presisjon er ein kunst berre dei beste meistrar. Blant dei er ein nordmann.

– Eg har sett på teknikken i akkurat den serven, og da gjør han akkurat det han skal gjere.

Eit anna viktig element er variasjon i servane. Analyseeksperten er klokkeklar:

– Der er han veldig god. Eg føler at han er betre enn alle dei andre.

Hastigheit, presisjon og variasjon gir ein gulloppskrift på korleis ein serve skal utførast. Den har Ruud ingrediensane på, og Sørvald meiner motstanderne nå blir skremt av nordmannen.

Og det har ikkje kome tilfeldig. I fjor ville Ruud prøve nokon nye ting. Fokuset blei oppkast av ballen og å plassere den litt lenger fram i banen.

– Han har nå utvikla både taktikken og teknikken på det i serven. Det trur eg han kjem til å få god bruk for resten av karrieren, seier Sørvald.

Eit stykke opp til verdsrekorden

Neste for Casper Ruud er ein ny grusturnering, nå i Rio de Janeiro. Tennisspileren frå Snarøya er direkte vidare til andre runde på walkover. Far og trener er «ekstremt happy» med starten på året.

– Han skal jo prøve å følge opp ein vanvitig god sesong frå i fjor. Det å da klare å vinne ein tittel så tidleg og med ein liten ankelskade i tillegg er veldig betryggende, seier han.

Ruud får dermed kort tid til å nok ein gang dundre til på serve i andre runde av ATP-turneringa i Brasil. ATP-rekorden ligg på 253 kilometer i timen, mens verdsrekorden har australske Samuel Groth på 262,9 kilometeren i timen.

For team Ruud er presisjon mykje viktigare.

– Det er gøy at han får til 230 innimellom og det er klart det setter motstandaren ut av spel. Viss man samtidig setter den i krysset blir det ofte ess.

Serve-ess er når ein skårar poeng utan at motstandar er nær ballen. På Ruuds susande tennisball i 230 kilometer i timen hadde ikkje Schwartzman ein sjanse.