Vebjørn Rodal om Sjöbergs påstandar: – Heilt usannsynleg

Vebjørn Rodal har ingen tru på at Patrik Sjöbergs påstandar om betalte dopingkontrollar på 80-talet kan vere rette.

Rodal

SKEPTISK: Vebjørn Rodal trur ikkje på Patrik Sjöbergs påstandar om Svein Arne Hansen og betalte dopingkontrollar

Foto: Åserud, Lise / NTB scanpix

– Det føreset at antidopingregimet i Norge har vore det ein må kalle korrupt. Og det har eg veldig lita tru på har skjedd. Eg har vanskeleg for å sjå føre meg at det kan stemme, seier Vebjørn Rodal.

Den tidlegare svenske høgdehopparen Sjöberg gjekk i går ut og sa at Svein Arne Hansen på 80-talet skal ha prøvd å skjule doping ved å betale for dopingkontrollar på utøvarar han visste var reine.

Hansen var då sjef for Bislett Games. No er han president i det europeiske friidrettsforbundet EAA.

NRKs friidrettsekspert var sjølv med i verdstoppen i friidrett på 90-talet.

– Usannsynleg

Han trur det er usannsynleg at Svein Arne Hansen kunne gjere det Sjöberg skuldar han for.

– Han kunne nok til ei viss grad vite kva for utøvarar som var reine, og kven som mest sannsynleg ikkje var det. Men å klare å manipulere antidoping-kontrollørane til å velje kven som skulle testast – den makta greier eg ikkje å sjå at Svein Arne Hansen skulle ha hatt, seier Rodal.

– Sjølv om dette skal ha foregått på 80-talet, kan eg ikkje forstå at systemet skal ha vore i den kategorien i Norge, seier Rodal, som ikkje kom inn i friddretten på seniornivå før tidleg på 90-talet.

– At det skal ha foregått noko slikt berre får år tidlegare, synest eg høyrest merkeleg ut.

Han seier skuldingane frå Sjöberg verkar helt fjerne.

– Kanskje har eg vore naiv og ikkje fått med meg alt. Men eg kan ikkje forstå at det har foregått slik, i Norge iallfall.

– Mottok du som utøvar nokon gong tilbod slik som Sjöberg skisserer?

– Nei, aldri. Og eg har ikkje høyrt om andre som har fått det heller.

Rodal trur at både Sjöberg og Hansen har ei så lang fartstid saman i friidrettshistoria at dei kan snakke seg ut av dette utan at det endar i retten.

Siste nytt

  • England med sterk seier mot Spania

    England slo Spania 3-2 på bortebane mandag i nasjonsligaen. Dette er første gang Spania slipper inn tre mål i en tellende hjemmekamp.

    Raheem Sterling
    Foto: Carl Recine / Reuters
  • Kristoffersen-saken etter sesongen

    Henrik Kristoffersen får innfridd ønsket om å ha rettssaken i striden med Norges Skiforbund etter sesongslutt. Saken går i Oslo tingrett i mars neste år, melder Aftenposten.

    Henrik Kristoffersen
    Foto: Vidar Ruud / NTB scanpix

Sendeplan

Kl. Program Kanal