Viking-supportarar med protest: – Folk er forbanna

På banneret skrive med raud måling hengt opp utanfor Viking stadion, står det:

«Mye penger, ingen ambisjoner», «respekt for fansen! Uten oss er dere ingenting» og «5 år å bygge, 3 mnd å rive!!!».

No fortel supporterleiar Roar Åkerlund kvifor dei har gjort det.

– Folk er frustrert, oppgitt og forbanna.

– Som det står på den eine plakaten: Det tok fem år å byggje opp, og tre månader å rive ned. Det sportslege, entusiasmen, klubbidentiteten – alt er på veg ned i eit svart hol. Det frustrerer alle som er glade i Viking, seier han til NRK.

NRK har ikkje lykkest i å få ein kommentar frå leiar Erik Nevland.

– Famlar i blinde

Åkerlund meiner det er to hovudårsaker til Viking-supporterane sin frustrasjon: Overgangsvindauget og det sportslege.

Viking har tapt fem av dei seks siste kampane i Eliteserien og i Europa-kvalik.

– Vi har spelarar vi knapt kjenner igjen. Vi har trenarar som famlar i blinde på det taktiske. Det går ikkje an å sjå kva lag Viking kjem til å stille med, seier Åkerlund.

Supporterleiaren trekk også fram holet etter Veton Berisha.

– Heile Viking venta på ein spiss. Samstundes har alle konkurrentar klart å forsterke seg offensivt.

Han meiner supporterane er nøydde til å seie ifrå på ein klar måte no.

– Førre gong gav vi beskjed for seint, og då rykka vi ned. Det er vår rett å gi beskjed når vi er misfornøgde. Parallelt er det vår plikt å stille opp. Folk må ikkje misforstå det med at vi ikkje skal støtte laget. Felt O skal fyllast opp. Men vi forventar eit snev av vilje og innsats frå trenarar og spelarar, seier Åkerlund.

Søndag tapte Viking 4–1 mot Rosenborg. I pausen erkjente trenar Bjarte Lunde Aarsheim at laget sleit stort.

– Vi slit eigentleg med det meste, og slepp inn to enkle mål. Vi gjer et formasjonsbytte, sa Aarsheim.

Like før slutt reduserte Viking ved mål av Mai Traore, men sjølve formasjonsbytet hjelpte lite mot to superspissar i form.

Briljerte

Tengstedt har berre vore i Trondheim i ein månad, men har verkeleg fått vist kvalitetane sine frå start. Sju mål har han scora på fem kampar.

– Det er ein draum å spele med Casper. Vi er som hand i hanske og den hansken klistra med lim på innsida. Det er umogleg å skilje oss, seier Ole Sæter til Discovery + etter kampen.

Sæter var mannen som opna festen på Lerkendal. Etter berre to minutt fekk han ballen i beina føre eit opent mål, og gjorde ingen feil.

Deretter var det spissmakker Tengstedt sin tur, som scora etter ein soloprestasjon.

På dagens tredje- og fjerde scoring, assisterte spissduoen kvarandre, og det er ikkje tvil om at Tengstedt trivst på topp i lag med Sæter.

– Ole er ein dyktig spiss, som eg prøver å lære av på trening og i kamp. Eg tykkjer vi fyller kvarandre godt. Han tek gode løp for meg, og eg prøver å gjere det for han. Det er kjekt, seier Tengstedt til NRK.

– Kva er det som klikkar så bra med deg og Rosenborg?

– Eg trur eg kom inn på eit godt tidspunkt. Då hadde dei vunne to kampar på rad. Det var sjølvtillit i laget. Og språket er ganske likt som i Danmark, så det er enkelt å følgje med, seier han vidare.