Hopp til innhold

Lewandowski tok rekorden med siste spark på ballen

Det såg lenge ut til at Robert Lewandowski ikkje skulle ta scoringsrekorden. Men sekund før kampen var slutt, sletta han Gerd Müllers 49 år gamle rekord.

Robert Lewandowski

REKORD: Robert Lewandowski har scora 41 ligamål denne sesongen, ny rekord i Bundesliga

Foto: Christof Stache / AFP

Då sette den 32 år gamle polakken inn Bayerns femte mål, og kom opp i 41 totalt.

Han var rørt og svært glad etter kampen.

– Eg har ikkje ord for dette. Når du prøver i over 90 minutt å score, og så skjer det med det siste sparket på kampen, så kjennest det heilt ufatteleg godt, sa den polske scoringsmaskina.

– Ein rekord er noko du må slåst for. Det kjem ikkje av seg sjølv.

Spenninga var stor før kampen. Ikkje berre om Lewandowski skulle greie å score rekormålet, men om han i det heile skulle ønskje det. I Tyskland heva deg seg i dagane før kampen røyster som meinte han burde la vere å score – eller spele i det heile – for å la rekorden på 40 mål forbli delt mellom Lewandowski og Müller.

Men i Polen var det Lewandowski-feber før kampen.

På ein enorm elektronisk reklameinstallasjon i det mest trafikkerte vegkrysset i Warszawa blir Robert Lewandowski (32) hylla for sin fantastiske sesong i Bundesliga.

På den eine visninga står det «40 mål – rekord av Lewandowski og Müller», og på neste «Lewandowski tangerte Müllers rekord, men kan framleis slå den».

Lewandowski-målteljing i Warszawa

MÅLTELJINGSMASKIN: Denne elektroniske reklamemaskinen står på det mest sentrale punktet i Warszawa og ventar på at Lewandowski skal setje inn rekordmålet

Foto: Zbigniew Kuczynski / Privat

Sist helg tangerte han rekorden. I dag trona han på toppen åleine.

Det var Polens største avis Gazeta Wyborca som kjøpte reklameplassen i krysset mellom Jerozolimskie Avenue og Marszałkowska-gata, også omtala som Warszawas svar på Times Square.

Der er det også lagt inn ei måltellingstavle, der Lewandowskis mål blir viste.

Også på bussane i den polske hovudstaden blir det vist opptak frå Lewandowskis scoringar denne sesongen.

– Robert, ver så snill. Vi vil ha eitt mål til og ny rekord, skreiv avisa. Dei måtte vente lenge, men fekk til slutt ønskjet oppfylt.

Lewandowski skadd – rekorden var i fare

Gerd Müller

LEGENDE: Gerd Müller scora 40 mål på 34 kampar i 1971/72

Foto: Michaela Rehle / Reuters

I 1971/72 scora Gerd «Der Bomber» Müller 40 mål på ein sesong – 34 kampar – i Bundesliga. Ein rekord det er så godt som umogeleg å slå, har vore omkvedet seinare. Ingen har vore i nærleiken heller.

Men det var før Robert Lewandowski sette i gang. 15. mai tangerte han legenda Müller med si 40. scoring, eit straffemål mot Freiburg.

Faktum er at Lewandowski har spela berre 29 av Bayerns 34 ligakampar denne sesongen. Han var ute ein månad med ein kneskade han fekk i ein landskamp for Polen i mars.

Då hadde han 35 mål, og det spøkte for rekorden. Men då han var tilbake etter ein månad, slo han fast at å slå Müllers rekord framleis var eit mål for han.

– Eg håpar at når eg er tilbake på bana, kan eg også vere tilbake til mitt vanlege nivå frå det første minuttet, og ta til å score mål igjen, sa Lewandowski i eit intervju med bundesliga.com.

Etter tangeringa av Müllers rekord, la Bayern München ut denne tweeten:

Laster Twitter-innhold

Begge sette sine rekordar for Bayern München. Müller scora i alt 398 mål for klubben i løpet av 15 sesongar. Lewandowski har 202 før det som kan bli rekordkampen, og det etter berre sju sesongar i klubben.

– Vi spøkte med at det er spelarar som ikkje greier å score 40 mål i heile karrieren, inkludert på trening. Og han gjer det på ein sesong. Det er sprøtt, seier lagkameraten Marc Roca.

«Alltid» ligameisterskap med Bayern

Robert Lewandowski

STORSCORAR: Robert Lewandowski har totalt 202 mål for Bayern på sju sesongar

Foto: Peter Kneffel / AP

Lewandowski gjorde seg merka med sine ekstreme scoringskvalitetar allereie på nivå to og tre i Polen med klubben Znicz Pruszków. Han blei oppdaga av storklubben Lech Poznan og hjelpte dei til polsk ligameisterskap i 2010.

Så blei det Bundesliga og fire sesongar i Borussia Dortmund frå 2010 til 2014. Der bøtta han inn mål som hjelpte godt til i klubbens to ligameisterskap og ein meisterligafinale.

Sidan 2014 har han spela for Bayern, og blitt ligameister i alle sju sesongane. Scoringstakten har på ingen måte avteke.

Han hamna i Guinness' rekordbok i 2015 etter ein kamp mot Wolfsburg. Der kom han inn som innbytar på stillinga 0–1. I løpet av ni minutt scora han fem gonger, og Bayern vann 5–1.

Men det er med tangeringa av Müllers rekord han verkeleg har skrive seg inn i historiebøkene. Der vil han kome med endå større skrift no når han nhar teke rekorden åleine.

– Hadde vore fin gest om han trekkjer seg frå kampen

Det var det likevel ikkje alle som ønskte.

Den gamle Bayern-spelaren Dieter Hamann meiner Lewandowski av respekt for Müller ikkje burde spele mot Augsburg.

– Det hadde vore ein fin gest av han om han hadde trekt seg frå kampen, sa Hamann søndag, ifølgje Sportsbuzzer.

Han viste til at Lewandowski bomma på to store sjansar i kampen mot Freiburg, etter at rekorden var tangert.

– Eg trur mange var letta då, fordi Müller hadde framleis sin rekord, sa Hamann.

– Å dele rekorden vil vere fantastisk, og mykje meir spesielt enn å slå han, sa den tidlegare midtbanespelaren, som no er tv-kommentator.

Han minner om Franz Beckenbauers påstand:

– Bayern ville ikkje vore der klubben er no dersom det ikkje var for Gerd Müller.

Også Peter Ahrens, kommentator i Der Spiegel, meinte det hadde vore det beste om rekorden forblir delt.

Det sa også Augsburgs trenar Markus Weinzierl til Kicker. Han hadde ein plan for å stoppe Lewandowski. Ikkje berre fordi han spela for motstandaren, men også fordi Weinzierl hadde Gerd Müller som sitt store ungdsomsideal.

– Han var min assistenttrenar i Bayerns amatørlag i fire år, og ein gong delte eg rom med han ei veke på treningsleir på Lanzarote. Eg kjenner han godt, og set stor pris på han.

– Vi skal gi alt for å redde rekorden til Gerd Müller, sa Augsburg-trenaren til Augsburger Allgemeine Zeitung fredag.

Robert Lewandowski

MÅL: Lewandowski-mål mot Borussia Mönchengladbach

Foto: Peter Kneffel / AP

Dei som helst ønskjer at Lewandowski ikkje skulle score, men dele rekorden med Müller, har også ei anna bekymring:

Keeper i Augsburg er nemleg polske Rafal Gikiewicz. I Tyskland blir det spekulert i at han ville hjelpe Lewandowski med å slå rekorden.

Det avviste sjølvsagt Glikiewicz på det sterkaste.

– Eg skal ikkje gjere det lett for Robert. Tvert imot. Eg skal gje alt for å forsvare buret, sa han.

Med fleire gode redningar av sjansar til landsmannen heldt den polske keeperen ord. Men i sluttsekunda måtte han gi retur på eit skot frå Leroy Sane, og då var Lewandowski på plass og scora.

Mål kvart 59. minutt sesongen gjennom

Men storavisa Bild meinte Lewandowski må få spele og prøve å slå rekorden. Dei meinte faktisk at Lewandowski allereie er best, og grunngjev det med tal:

Han har scora eit mål kvart 59. minutt i gjennomsnitt. Müller brukte i gjennomsnitt 77 minutt. Det er fordi Lewandowski har spela berre 28 av årets 33 kampar, medan Müller spela alle 34 kampane i sin rekordsesong.

Bayern-trenar Hansi Flick valde å ikkje spare Lewandowski i sin siste kamp som Bayern-trenar.

Laurdag kveld er Robert Lewandowski rekordhaldar åleine. Til enorm jubel i Polen.

Siste nytt

  • Frustrasjonskveld for Barcelona

    Barcelona skuffa med 0-0 og utvisning i ligastarten heime mot Rayo Vallecano laurdag kveld.

    Målkongen Robert Lewandowski, innkjøpt frå Bayern München, ligadebuterte i Spania, men fekk lite til.

    Barcelona hadde 18 avslutningar, men det var likevel gjestene som hadde dei største sjansane.

    Vondt blei til verre for Barcelina då kapteinen Sergio Busquets blei utvist på overtid etter å ha planta albogen i ansiktet på ein motspelar.

    Sergio Busquets
    Foto: ALBERT GEA / Reuters
  • Ruud utslått i semifinalen

    Det blir ingen finale på Casper Ruud i ATP1000-turneringa i Montreal. Han tapte 2-1 for polske Hubert Hurkacz i semifinalen laurdag kveld.

    Ruud kom godt i gang, braut polakkens serve på 5-5, og vann første sett 7-5.

    Men i andre settet var det Hurkacz sitt brot som blei avgjerande, og han tok settet med 6-3.

    I det tredje avgjorde polakken med å bryte begge Ruuds første servegame, og vann med 6-2.

    Casper Ruud
    Foto: Paul Chiasson / AP
  • Milan opna tittelforsvaret med siger

    Tittelforsvarar Milan opna den sye sesongen i Serie A med 4-2 over Udinese laurdag, etter 2-2 ved pause.

    Milan kom bakpå etter to minutt, men snudde til leiing. Ved pause var det 2-2, men Milan avgjorde i andre omgang.

    Theo Hernandez, Ante Rebic 2 og Brahim scora for Milan.

    Inter, som var hardaste utfordraren til sin byrival sist sesong, vann også sin opningskamp, men måtte slite borte mot Lecce.

    Først fem minutt på overtid sette Denzel Dumfires inn 2-1. Rumelu Lukako gav Inter ei tidleg leing. Lecce utlikna rett etter pause,

    Charles de Ketelaere, Milan
    Foto: DANIELE MASCOLO / Reuters

Sendeplan

Kl. Program Kanal
Spilleliste med 52 klipp
Sport
Spiller nå
Her stagediver Vetle Sjåstad Christiansen etter den fjerde Blink-seieren 00:55
Neste