NRK-ekspert måpar av hopphelt – gjer comeback 35 år etter debuten

I desember 1988 fekk ein 16 år gammal Noriaki Kasai sin debut i verdscupen på heimebane i Sapporo. 35 år og to månader seinare skal han igjen hoppe verdscup same stad.

– Eg er i kjempeform, som eg alltid pleier å vere på denne tida av året!

Det skriv superveteranen i ein e-post til NRK, tilsynelatande full av sjølvtillit før comebacket i verdscupen.

I Sapporo i januar var Kasai beste japanar i to av tre COC-renn, som er nivået under verdscupen. Kasai vann også ein nasjonal konkurranse helga etter.

Dermed er han ein del av den nasjonale kvoten japanarane får stille i verdscupen på heimebane.

– Eg bryr meg ikkje om alderen i det heile, han har ingenting å seie, skriv han.

NRK-ekspert måpar

Kasai hadde allereie hoppa i 20 år i verdscupen då NRKs hoppekspert Johan Remen Evensen sjølv debuterte i 2008.

Nordmannen har for lengst lagt opp, og trur knapt det er sant når han får høyre at Kasai igjen skal hoppe med dei beste i verda.

– Det er jo heilt utruleg, men det viser også kor vanvitig bra denne fyren har vore og er. Viss han klarer å komme seg tilbake og levere som i Japan i det siste, så er det berre frykteleg imponerande, seier hoppeksperten.

– Men seier det ikkje litt om nivået at ein 51-åring kan gjere comeback i verdscupen?

– Jo, men det seier også litt om korleis skihoppinga har utvikla seg dei siste 10–15 åra. Det tekniske utføringa og utstyret har fått meir å seie, seier Remen Evensen og fortset:

– Det er framleis viktig med fysiske føresetnader, men no handlar det mykje meir om dynamikk og det å bevare fart og fly-eigenskapane. Og der har Noriaki Kasai vore blant dei aller, aller beste i mange år.

– I ein heilt anna form

Kasai har vore ganske langt unna toppforma dei siste åra, og det er fleire som har tvilt på om han skulle klare å komme tilbake. Blant anna trenaren hans, slovenske Matjaz Zupan.

– Då eg såg tilstanden hans førre sesong, trudde eg ikkje han kunne komme tilbake på dette nivået, seier Zupan til NRK og legg til:

– No er han i ein heilt anna fysisk form. Han trenar betre og han har ei kroppsvekt som gjer at han igjen kan konkurrere på dette nivået.

Zupan er trenar for det private laget Tsocheya Home, som Kasai er ein del av. Han forklarer at nivået i japansk hoppsport ikkje er på topp akkurat no, og at det er ei av årsakene til at Kasai får sjansen i verdscupen.

Ryoyu Kobayashi er i verdstoppen, men bak han har det vore tynt denne sesongen.

– Kasai er på eit mykje høgare nivå i år enn i fjor. Men kva det betyr i verdscupen er vanskeleg å seie. I store bakkar kan han ta verdscuppoeng, seier Zupan.

Målet er OL i 2026

Skulle Kasai bli blant dei fem beste japanarane i konkurransane i Sapporo til helga, er sjansen stor for at han får vere med i fleire verdscupkonkurransar framover.

Om under ein månad er det klart for RawAir med konkurransar i Holmenkollen, Granåsen og Vikersund.

– Eg hadde blitt så glad om eg kunne fly i Holmenkollen og Vikersund igjen, to av favorittbakkane mine, skriv Kasai.

Men hopphelten nøyer seg ikkje med å gjere comeback i verdscupen. Han har sett seg som mål å vere med i OL i Milano/Cortina i 2026. Det vil i så fall bli hans niande OL i ein alder av 53 år.

– Det ville vore heilt utruleg om eg kunne deltatt i OL i 2026. Då vil eg bli hugsa både i Japan og resten av verda, skriv han.

Kasai nådde ein milepæl allereie i OL i Sotsji for 10 år sidan, då blei han den eldste medaljevinnaren i historia i skihopping i eit OL. Der tok han både sølv og bronse.

Og kanskje finst det enda fleire kapittel i historia om Noriaki Kasai.