Messi-feber prisar ut supportarar: – Fotballen i ferd med å bli for dei rike

Den kampavgjerande scoringa i debuten etterfølgt av fire scoringar og ein målgivande pasning i dei to neste kampane leivde ingen tvil: Lionel Messi held framleis koken, og har sørga for Messi-feber i USA.

Men det kostar å få eit glimt av den argentinske 36-åringen.

– Den pengegaloppen som det har blitt snakka om i mange år viser ingen teikn til å minke. Det bevegar seg dit at fotballen blir for dei rike, seier Viaplay-kommentator Petter Veland.

– Det er synd at den vanlege mannen på gata blir prisa ut frå å sjå Messi, legg han til.

Veland har følgt Lionel Messi tett i ei årrekkje og har, som dei fleste andre, fått med seg suksessen Messi har hatt i USA dei siste vekene. Han er i det heile ikkje overraska over oppstyret rundt argentinaren.

For det er ikkje berre i Miami det er Messi-feber.

Dyrare enn Taylor Swift

Natt til søndag norsk tid spelar han sin fyrste bortekamp med Inter Miami. Turen går til Texas, der dei møter FC Dallas i den nordamerikanske turneringa Leagues Cup.

Kampen blei utselt på ti minutt, ifølgje heimelaget.

Alle dei som ikkje fekk tak i billett har moglegheit til å sikre seg via vidaresal inne på FC Dallas sin nettstad. Men det kostar.

Dei billegaste ligg ute til 700 dollar (7184 kroner), mens fleire av dei går så høgt som 9000 dollar. Svimlande 92.000 kroner. Det skriv The Athletic.

Til samanlikning kostar dei billegaste billettane til ein Taylor Swift-konsert i California 500 dollar (5130 kroner).

– Det er kanskje nokon som vil ta eit aktiv val om å stå igjen på perrongen når pengetoget i fotballen går, og det må man ha forståing for. Med slik prisar er det sjølvsagt mange som vil miste moglegheita til å sjå Messi, og det er heller ikkje bra, konstaterer Veland.

Auka med 500 prosent

Etter nesten to tiår med uavbroten suksess i Europa og ein VM-tittel i desember, er interessa for Lionel Messi på amerikansk jord rett og slett enorm. Ifølgje Forbes har prisaukinga på billettar vore enorm:

• Den gjennomsnittlege billettprisen til heimekampane til Inter Miami auka 459 prosent.
• Prisane til dei sju neste bortekampane auka med 558 prosent

Før Messi blei annonsert som ny Inter Miami-spelar, kosta dei billegaste billettane til Inter Miami sine heimekampar 29 dollar – nesten 300 kroner.

– Det verkar ganske spinnvilt og fortel mykje om dei ekstreme marknadskreftene som er i sving når ein av dei beste spelarane gjennom tidene treff den amerikanske marknaden, seier Veland.

Inter Miami sin neste heimekamp mot Charlotte FC er også utseld. Dei billegaste billettane var 160 dollar, rett i overkant av 1600 kroner. Ein må ut med langt meir om ein skal kjøpe frå dei som legg billettane sine ut for vidaresal.

Chicago Fire, som skal møte Messi og Inter Miami i starten av oktober, reknar ifølgje The Athletic med å tene meir på den eine kampen enn på alle dei andre heimekampane til saman.

Blir prisa ut

Fleire Inter Miami-supporterar har teke til X, tidlegare kalla Twitter, for å ytre si misnøye med prisane.

– Det er ikkje snakk om noko som burde skje. Vi snakkar om noko som må skje. Inter Miami må senke prisane framover. Dei som er villige til å jamleg konsumere produktet har ikkje råd. Dei som har råd, vil ikkje regelmessig gå på kamp, skriv Franzo Panizo, som grunnla Inter Miami-podkasten «Miami Total Futbol».

Ei rekke celebre gjestar har vore på plass for å sjå Messi sine tre fyrste kampar i den rosa drakta.

Basketballstjerna LeBron James, tennislegenda Serena Williams og baseball-profilen Derek Jeter er blant idrettsstjernene som har vore på kamp. NFL-legenda Tom Brady har også vore der.

Artistane DJ Khaled, Sean Combs (betre kjent som P. Diddy), Camilla Cabello og realitystjerna Kim Kardashian er andre som har sett Messi på nært hald.

Eit anna fenomen er at dei frammøtte forlét stadion når Messi har blitt bytta ut. Det er nok eit eksempel på at det er Messi som er hovudattraksjonen.

– Eg la eigentleg ikkje merke til det. Men med tanke på kva for ein spelar han er, skjønar eg at det skjer, har Inter Miami-trenar Gerardo «Tata» Martino sagt om kva som skjer når Messi blir bytta ut.

Messi har hittil levert varene på bana, men også utanfor merkar Inter Miami fordelane ved å ha mannen som har vunne Gullballen sju gongar. Inter Miami hadde 900.000 følgjarar på Instagram før Messi blei annonsert. No har dei over 13 millionar.

Om Messi held fram med storspelet og skåringane, er det lite som tyder på at verken antal følgjerar på sosiale medium eller billettprisar går ned.

– Det er ei veldig kompleks sak, og eg ser inga snarleg løysning på det. Alt blir dyrare i samfunnet, og det blir spegla i fotballen. Og så er det ofte slik det funkar: Flyselskap skrur også opp prisane på destinasjonar som er populære, seier Veland, og legg til:

– Men i fotballen får man desse heilt avsindige summane av og til, seier Veland.