I Paris Saint-Germains meisterligamøte mot Real Sociedad tysdag, blei PSG-spiss Kylian Mbappés fart på 100 meter estimert til 10,9 sekund.
«Det er berre litt over eit sekund bak Usain Bolts verdsrekord», skreiv BBC Sport.
Til 71,8 millionar følgarar på Instagram skreiv den populære fotballkontoen 433:
– Kylian Mbappé slo nesten Usain Bolts verdsrekord på 100 meter.
Da vakna den norske sprintkometen Håvard Bentdal Ingvaldsen, som tok seg til VM-finalen på 400 meter i fjor. Han er blant dei mange som har påpeika at samanlikninga med Bolt ikkje er så imponerande.
– Eg trudde faktisk han var raskare, skreiv han i kommentarfeltet til 433.
– 10,90 er ikkje så raskt og det var mest sannsynleg gjort med fart frå før. Det er ikkje eingong i nærleiken av verdsrekorden for kvinner på 100 meter, la Ingvaldsen til.
NRKs friidrettskommentator Christina Vukicevic Demidov kom òg med klar tale på Instagram:
«Stopp samanlikninga av sportar».
– Eg lo da eg såg det
Friidrettskontoen Jumpers World, med 650.000 følgarar på Instagram, har vore i kontakt med Bolt om samanlikninga til 433.
– Eg lo da eg såg det. Kvinnene spring raskare enn det, skreiv Bolt.
Det internasjonale friidrettsforbundet har òg meldt seg på latterleggjeringa:
«10,90? Så søtt», skriv dei på X, med bilete av sprintarane Shericka Jackson og Shelly-Ann Fraser-Pryce, som fniser i lag.
Verdsrekorden for kvinner er det amerikanske Florence Griffith-Joyner som har, med tida 10,49.
Mbappés estimerte 10,90 hadde ikkje halde til meir enn ein 13. plass på årsstatistikken til det internasjonale friidrettsforbundet for kvinnene i 2023 – og 5182. plass for menn.
– Dei raskaste kvinnene i verda er ekstremt raske. Så det er respektlaust overfor friidrettsutøvarane å samanlikne Mbappé med dei beste sprintarane i verda. Han er vanvitig rask, men det er noko heilt anna, seier sprintar Even Meinseth til NRK.
– Han hadde vore ute av kamerabildet
Samanlikninga fekk nemleg òg Meinseth til å ta til tastaturet:
27-åringen, som har 10,29 som personleg rekord og har vunne tre NM-gull på 100 meter, meiner det er forskjell på å vere «fotballrask og friidrettsrask».
– På bana har ein allereie fart frå før, mens i friidrett skyt ein ut frå startblokk. Det er umogleg å samanlikne eigentleg, seier sprintaren.
Bolt sprang eksempelvis dei siste 100 meterane i ein 150 meter på 8,70 sekund tilbake i 2009.
– Det er sikkert ein del sprintarar som ikkje hadde verka så raske på grasmatta, og utøvarar som er raske i fotball som ikkje hadde fått det til på friidrettsbana. Å springe med fotballsko på gras er noko anna enn å springe med piggsko som sprintar, seier Meinseth.
Speed Showdown har laga ein simulasjon av korleis det hadde sett ut om Mbappé hadde sprunge mot Bolt på friidrettsbana.
– Viss du set dei ved sida av kvarandre, slik som i simuleringa, ser ein at Mbappé fort hadde vore ute av kamerabildet, seier Meinseth.
Trur Haaland kunne blitt mangekjempar
Men sprintaren meiner det er fleire store fotballspelarar som kunne blitt suksessfulle friidrettsutøvarar:
– Sjå på dei, dei er vanvitige atletar. Erling Braut Haaland med styrke og spenst, som er relativt rask. Og Mbappé med hurtigheit og akselerasjon. Dei er raske i tillegg til å skulle skåre mål.
Haaland har òg ein høgst uoffisiell verdsrekord i friidrett som femåring:
– Kva friidrettsgrein trur du dei kunne blitt gode i?
– Mangekamp for Haaland. Han har allsidigheita, men er ikkje skikkeleg god til å sprinte, slik som Mbappé, som har den ekstreme hurtigheita. Han trur eg burde satsa på nettopp sprint.
– Eg skjønner at dei valde fotballen med tanke på pengar, fleipar Meinseth.