Sprang frå Bergen til Oslo med fire timar søvn: – Eg hallusinerte

Etappen, som starta på måndag, brukte han fire dagar og 11 timar på. Ramsfjell anslår at han sov fire timar i løpet av dagane, medan 90 timar har vorte brukte på rein løping.

– Eg er litt overraska sjølv over kor bra det har gått. Det er ikkje noko du kan trene på, så ein veit ikkje korleis ein vil reagere på det, seier ultraløparen til NRK.

– Korleis står det til med kroppen?

– Når eg sprang hadde eg eigentleg ikkje noko vondt. Hadde forventa vondt i kneet og andre plassar, men det var berre når eg stoppa og kroppen gjekk i kvilemodus. Då låste kroppen seg heilt og det tok litt tid før løpesteget var normalt igjen, svarer han.

– Hallusinerte

Turen starta som sagt på måndag denne veka, og formålet var å samle inn pengar til Mental helse Ungdom. Så langt er 200.000 kroner samla inn.

– Du klarte målet på under fem dagar med tida fire dagar og 11 timar, korleis kjennest det?

– Det er veldig bra! Sånn det vart lagt opp med etappane skulle eg komme føre skjema og ta det derfrå. Eg heldt berre forspranget heilt inn.

Og turen som gjekk frå Bergen til Oslo gjekk ikkje heilt knirkefritt. Naturleg nok vil kanskje nokon hevde.

Ei natt på Hardangervidda gjekk nemleg hardt for seg.

– Då hadde eg ein halv time søvn på 48 timar. Eg hallusinerte og det var skikkeleg kaldt. Den natta var skikkeleg tøff å komme seg gjennom, fortel han.

Byrja for to år sidan

I fjor prøvde Ramsfjell på eit liknande stunt, då han frakta seg sjølv frå Nordkapp til Lindesnes på rulleski.

Denne gongen gjekk turen på tvers av Noreg, med berre føtene som transportmiddel. Og overraskande nok, er ikkje løpinga noko han har gjort mykje av.

– Eg byrja med løping i 2021, og sprang eit ultraløp. Eg gav meg med skiskyting, og så har eg vore ein del skadd, så det er ikkje før i år eg har sprunge så mykje samanhengande. Planen var å gjere dette om nokre år når eg hadde sprunge mykje, men eg vart freista til å prøve i år etter at det gjekk så fint i fjor. Eg var spent på grunn av lite erfaring.

Ultraløparen, som har bakgrunn som skiskyttar, forklarer kvifor han har teke overgangen slik:

– Det er vel berre ein interesse-ting. Folk har rare interesser, denne er veldig rar. Eg har alltid hatt lyst til å gjere annleis ting. No ville eg gjere noko ingen i Noreg hadde gjort. Du kan gjere det som ung og bruke motoren frå skiskyting. I staden for å bruke sju år på å bli klar kan ein vere litt i styrkerommet og berre kaste seg ut i det.