– Vinny ikkje skyt, ropa Citys Sergio Agüero då kampteinen fekk ballen meir enn 25 meter frå mål.
– Det var eit råd det var uaktuelt å følgje, sa Kompany.
Så ladda han kanona og fyrte av. Og redda kanskje ligagullet for Manchester City.
City fekk det tøffare mot Leicester enn det dei hadde tenkt seg måndag kveld, og kunne puste svært letta ut etter sigeren – nummer 13 på rad.
70 minutt var nesten gått. City pressa og pressa, men svidde alle sjansane. Leicester forsvarte seg ekstremt godt.
Liverpools håp om at City skulle gå på eit avgjerande glipptak i liga-innspurten, tok til å spire.
Då var det kapteinen steig fram. Vincent Kompany fekk ballen langt ute, fann ikkje gode alternativ, og valde å smelle til. Frå 25-30 meter fauk prosjektilet inn i krysset. Ikkje eingong Kasper Schmeichels tigersprang kunne gjere noko med det.
– Eg har scora slike mål på trening, sa Kompany.
– Ikkje skyt
MANAGER: Pep Guardiola ville ikkje at Kompany skulle skyte. - Heldigvis følgde han ikkje tankane mine
Foto: Paul Ellis / AFP– I løpet av 15 år har alle sagt til meg «ikkje skyt, spel ballen». Men i dag var det uaktuelt å følgje det rådet, sa han.
– Vi tok til å bli litt frustrerte, la han til.
Manager Pep Guardiola var ein av dei som ikkje ville at han skulle skyte.
– Eg sat på benken og tenkte «ikkje skyt, ikkje skyt». Men han var smart, han følgde ikkje tankane mine, sa Guardiola.
Leicester forsvarte seg godt, men fekk det vanskeleg etter kvart.
– Vi jobba skikkeleg hardt, men vi var tunge i beina på slutten. Og vi kan ikkje gi Kompany så mykje tid som han fekk ved scoringa, sa Leicesters keeper Kasper Schmeichel.
– Vi såg at vi møtte eit topplag. Eg kan ikkje sjå noko anna enn at dei også slår Brighton søndag, sa han.
Ikkje sidan Brann stadion i 2007
33-åringen har aldri før scora for City frå utanfor 16-meteren. Då han først gjorde det, kan det ha sikra klubben hans eit nytt ligameisterskap.
Sjå scoringa her (video med løyve frå TV 2):
Ifølgje TV 2s studio var sist Kompany scora frå utanfor feltet var på Brann stadion i 2007, for Hamburg i ein europacupkamp.
– Han er ein mann for dei store anledningane, sa Brede Hangeland.
TV-bileta viste ein emosjonell Vincent Kompany som fekk klem av omtrent alle City-spelarane og lagleiarane på bana då kampen var avblåsen.
– Det var ei scoring som er verd ligatittelen, sa BBCs kommentator Chris Sutton.
Leicesters store sjanse
Dermed kunne City senke skuldrane. Manager Pep Guardiola hadde vore svært så aktiv og gestikulerande på sidelinja. No kunne han slappe litt meir av.
Likevel kunne det lett ha gått gale for ligaleiaren. Tre minutt før slutt glapp det i forsvaret, og Kelechi Iheanacho blei spela heilt fri, men åleine med keeper sette nigerianaren ballen utanfor.
Manchester City måtte vinne for å ha overtaket i tittelkampen før siste runde. Poengtap ville sende Liverpool til førarsetet. No har Manchester-laget lagnaden i eigne hender.
I siste kamp søndag ventar Brighton borte. Samstundes møter Liverpool Wolverhampton heime. Eitt poeng skil laga i Citys favør, det betyr at dei er ligameister med siger.
