– Først og fremst er eg glad for at det gjekk så bra som det gjorde. Det er skremmande at det kan skje ein så frisk gut. At han som er så godt trent skal hamne i ein slik situasjon er veldig skremmande, seier Johaug til NRK.
Fossli var ute på biltur med kjærasten, da hjarte utan forvarsel stoppa. Ved hjelp av kjærasten og ein forbipasserande syklist som handla raskt, redda det truleg livet til sprintløparen.
Hendinga får også Johaug til å tenke tilbake på si gode vennine og tidlegare langrennsløpar Ida Eide (30) som omkom etter at ho fekk hjartestans under eit mosjonsløp i september i fjor.
– Heldigvis hadde Sondre englevakt og dei rette folka rundt seg som gjorde at det gjekk bra. Men det er heilt klart at det vekker kjensler. Ein blir redd og tenker om dette verkeleg er verd det, seier ein tydleg prega Johaug.
Ho legg til at det sjølvsagt pregar miljøet hennar når det kjem så tett på, samstundes som det vekker minner til dei som ikkje har vore like heldige som Fossli.
– Ein blir jo redd, eg innrømmer det. Ein tenker jo på om det er sunt å presse seg på den måten som vi gjere og om det er ein samanheng.
OL-gullet betyr ikkje like mykje lenger
På spørsmål frå NRK om dette betyr at Johaug sjølv har vurdert sin eigen karriere med tanke på det som har skjedd i skimiljøet dei siste åra, så svarar skiløparen frå Dalsbygda slik:
– Sånn som eg ser på det, så held eg på med toppidrett så lenge det gir meg noko. Om det blir etter denne sesongen eller om to år, kan eg ikkje gi noko svar på no. Men eg må innrømme at det OL-gullet i Beijing betyr ikkje så mykje for meg lenger, som det kanskje gjorde for nokon år sidan.
Hatt lege på besøk
Også dei andre landslagskvinnene som var samla til pressetreff i Torsby i Sverige i dag var tydleg prega av det som har skjedd med den 26-år gamle lagkameraten.
– Det er litt ekkelt. Det blir ein liten vekkar, heldigvis gjekk det bra. Når du får beskjed om sånt er det ikkje så viktig med «dissa skia», seier Heidi Weng.
Maiken Caspersen Falla har sjølv opplevd at ho for nokon år sidan hadde ein bi-lyd på hjarte. Ho meiner dei blir tatt godt vare på og at landslaget er flinke til å ta dette på alvor.
– Vi har hatt besøk av sjefslegen som har informert oss litt i dag, og det er uvanleg at dette skjer. Så eg håpar vi klarar å gå rundt og ikkje bekymre oss.
Tar grep
Medisinsk ansvarleg Ola Rønsen som i dag har vore i samtale med skijentene forstår at ei slik hending er skremmande.
– Vi skjøner at dei spør om sånt når slike ting skjer. Den refleksjonen synest eg er sunn. Det handlar om å byggje tryggleik rundt dei. Vi gjere det med fleire tiltak. Vi har også snakka om å ha med hjartestartar på trening og der vi ikkje har med smørebussen.