Ingebrigtsens skremmeskot: I sitt livs form trass marerittvinter

– Vi snakkar om eit skremmeskot til dei beste konkurrentane som ikkje er her. Ei kanonkule til Josh Kerr og dei andre, sa NRKs ekspertkommentator Vebjørn Rodal på lufta fredag kveld.

Da hadde Jakob Asserson Ingebrigtsen akkurat blitt den fjerde i historia til å springe 1500 meter på under tre minutt og 27 sekund.

Den nye europarekorden lyder på 3.26,73.

På direkte spørsmål frå NRK om han er i sitt livs form, svarer 23-åringen kontant:

– Ja.

Avslørte skadeproblem i vinter

At han også i 2024 skulle sette nye rekordar, var langt frå sjølvsagt om vi skrur tida nokre månader tilbake.

I januar var NRK på besøk hos løparstjerna. Da avslørte han at han hadde slite med skade gjennom heile vinteren.

Problemet var ein betennelse som har bite seg fast i hinna rundt akillessena på den høgre foten.

– Når han blir hoven, klistrar han seg på sena. Da vil ikkje ho fungere og skli som ho skal. Viss ein fortset kan det komme ein slitasje på sena, og det blir ein ikkje kvitt med mindre ein opererer. Så det er verd det å ikkje gjere noko dumt, sa Ingebrigtsen.

Han fortalde om tallause timar med alternativ trening – og uvisse utsikter for sesongen.

– Eit ganske klart svar

Nå ser det ut til at skaden ikkje har øydelagt moglegheitene for å forsvare OL-gullet på 1500 meter.

Forma er rett og slett betre enn i fjor. Det vil seie betre enn nokon gong før.

– Eg tenker vi får eit ganske klart svar på det i kveld, seier Ingebrigtsen i intervjusona etter rekordløpet.

– Korleis ligg du an i førebuingane til OL?

– Ganske bra. Det er seks veker sidan eg starta sesongen, og eg har hatt ei veldig fin formkurve sidan da, konstaterer 23-åringen.

Han innleidde sesongen med å springe ei engelsk mil i Diamond League-stemnet i Eugene 25. mai. Da var det, ikkje overraskande, eit stykke til toppforma.

Ingebrigtsen blei likevel nummer to, berre slått av overmannen sin frå VM-finalen på 1500 meter i fjor, Josh Kerr.

– Eg var langt nede i vinter, mest på grunn av usikkerheita. Og ikkje minst frustrasjonen rundt det å ikkje bli frisk i den skaden eg hadde. Berre det å vere i den situasjonen her nokre månader etterpå, er fantastisk. I ei sånn mørk tid som det var, så fryktar ein det verste, sa Ingebrigtsen til NRK i Eugene.

– Vore avhengig av tida

Løpet i Eugene er einaste gong Ingebrigtsen har stilt til start utan å vinne i 2024. To gull i EM blei følgt opp med to gull i NM.

Løpet i Monaco blei hans andre Diamond League-seiar for året.

– Eg har vore avhengig av den tida sidan sesongstart, på ein heilt annan måte enn eg har vore tidlegare. Tidlegare har eg flote på eit grunnlag, som eg har bygd gjennom vinteren. Nå er eg avhengig av å få kvar økt, kvar dag og kvar veke på sommaren, påpeikar han.

Og fastslår:

– Det har fungert veldig bra opp til nå.

Så påpeikar han at det framleis er tre viktige veker som står att før OL, der alt må gjerast rett.

– Men eg er absolutt i ein veldig god posisjon, konkluderer han.

– Kan ikkje sluntre noko vekk

– Kva må du springe på i OL for å stikke av med gullet?

– 3.29.

– Ikkje betre?

– Eg trur alle som spring 3.29 eller fortare kan vinne i OL. Det har ein sett tidlegare, og det ser ein i kveld òg. Det er mange gode tider og prestasjonar over heile linja. Ikkje berre i kveld, men gjennom heile sesongen fram til nå. Det er ein bra situasjon å vere i, ikkje berre for 1500 meter, men for friidretten, seier han, og forklarer:

– Det gjer at ein må vere fokusert, og alltid gjere så godt ein kan. Ein kan ikkje sluntre noko vekk. Vi er jo ganske gode på å gjere ting skikkeleg.

Nå tar han med seg opplevinga frå Monaco tilbake til høgdetrening i St. Moritz.

– Det er ei digg kjensle, fastslår Jakob Asserson Ingebrigtsen.

PS! Ingebrigtsen har tre gonger i EM klart å vinne dobbelen, med gull på 1500 og 5000 meter. I begge dei to siste utgåvene av VM har det enda med sølv på 1500 og gull på 5000 meter. I OL prøver han seg igjen på både 1500 og 5000 meter.