21-åringen har allereie samla triumfar og medaljar i seniormeisterskap i fire år. Men den store diamanten ein får som vinnar av Diamond League, har han aldri sikra seg.
– Uflaks! seier Jakob Ingebrigtsen om grunnen, og ler.
I fjor vart han olympisk meister, og slo Timothy Cheruiyot for første gong. Men då finalen i Diamond League gjekk dryge månaden seinare, var det kenyanaren som var sterkast i duellen. Han hevdar det gjekk som forventa.
– Der og då gav det meg ikkje så mykje som eg skulle ønske at det gjorde, så det er litt annleis no, seier Ingebrigtsen.
– Då var eg ganske sliten etter det som skjedde i Tokyo. Forståeleg nok. Eg kjenner meg litt betre og betre førebudd i år. Før det har eg berre ikkje vore betre, legg han til.
– Eit større mål
Andreas Thorkildsen var første nordmann til å vinne Diamond League-finalen, første året det vart arrangert, i 2010. Karsten Warholm vann trofeet både i 2020 og 2021. På 1500 meter har heile 10 av 11 finalesigrar gått til Kenya.
Og Ingebrigtsen erkjenner at det er ein tittel som heng ganske høgt.
– Det er gøy å vinne ting ein ikkje har vunne før, og eg veit at det er mykje som skal til for å kvalifisere seg til dette løpet. Det er dei beste av dei beste, det er ein faktisk finale, fortel han, og legg til at det er vanskeleg å samanlikne det med medaljar.
– Det er det som er fint. Ein kan jobbe for litt ulike ting, så det er absolutt eit større mål for meg og å vinna finalen.
Spår meir uføreseieleg løp
Den doble europameisteren har vunne alle Diamond League-stemna han har delteke i denne sesongen. Ei engelsk mil i Eugene og på Bislett, og på 1500 meter i Lausanne. No er det klart for det siste stemnet i år, i Zürich, der 1500-meteren går torsdag.
Men han trur ikkje på like raske tider som for snart to veker sidan.
– Det er litt meir som står på spel enn det vanlegvis gjer i eit vanleg Diamond League-stemne, så folk vil nok springe litt meir uryddig og litt meir usikkert enn dei pleier å gjere. Når det står mykje på spel som i meisterskap, så gjer ein mykje dumme ting, som gjer at det kan vere meir uføreseieleg. Men eg liker veldig godt å springe fort og samtidig vinne, seier Ingebrigtsen sjølvsikkert.
Det er 30.000 sveitserfranc, altså litt over 300.000 kroner, i premie til vinnaren.
– Det tenkjer eg svært lite på, fastslår han.
- Sjå Diamond League frå Zürich på NRK2 frå kl. 17.30 onsdag kveld, og frå kl. 19.00 torsdag.