– Det er mykje i løpet som er bra. Men han manglar det ekstra giret og krafta på slutten, sa NRKs ekspert Aleksander Hetland like etter løpet.
Christiansen heldt lenge følgje med dei beste. Halvveges låg han på fjerdeplass, like bak dei tre beste. Men dei siste par hundre metrane blei lange, og avstanden større. Han kom i mål på tida 7.47,99, 1,89 sekund frå pallen.
Det er første meisterskapet på fire år han ikkje tek medalje. Og 800-meteren er ein distanse han skal satse på i OL.
– Det har vore ei hard veke. Eg merkar at det er lenge sidan sist eg har gjort det (symt meisterskap). Men det har vore veldig god trening. Det er akkurat det eg treng no for å vere raskare i OL, seier Christiansen etter sin siste start i EM i Budapest.
Han ser ikkje på fjerdeplassen som sur.
– Medalje var ikkje det viktigaste no. Det er viktigare konkurransar seinare.
No skal han heim til Norge for å få konkurransetrening. Det har det vore smått med under korona-epidemien.
– Men treningsarbeidet er lagt ned. Dei to neste månadene blir meir finpussing for å finne fart, flyt og teknikk.
NRK-ekspert Aleksander Hetland er ikkje misnøgd med det han har sett av Christiansen i EM, men vedgår at han likevel hadde håpa at det norske symjehåpet hadde vist litt meir styrke, med OL berre eit par månader unna.
– Alt i alt leverer han OK. Han er allereie klar for OL, og har ikkje spissa forma til dette meisterskapet. Men eg hadde håpa at han hadde vore litt lenger framme utan spissing av forma, slik at han har litt å gå på, seier Hetland.
Christiansen hadde nest beste tid i forsøket på 400 meter fri.
Mykhailo Romantsjuk frå Ukraina blei europameister med 7.42,61. Gregorio Paltrinieri tok sølvet og Gabriele Detti bronse, begge frå Italia.
På 400 meter fri tidlegare i meisterskapet låg han an til medalje i 300 meter. Så møtte han veggen og blei nummer 7. Den same plasseringa fekk han på 1500 meter nokre dagar seinare.
Christiansen er ein av dei beste langdistansesymjarane i verda, meiner Hetland. På 400-meteren var han knapt halvtanna sekund unna medalje, og på 800 hang han godt med lemnge, med hadde ikkje sluttspurten inne.
– Men han må heve seg mykje til OL. Der må han symje raskare enn nokon gong før, og det held ikkje berre å sikte seg inn mot nye personlege rekordar på 800 og 1500 meter, seier NRK-eksperten.
Christiansen er samd.
– Dei andre sym fort. Det kjem dei til å gjere om to månader også. Det betyr ikkje så mykje no, det er viktigare om to månader.
EM er hans første konkurransar sidan 2019, for eitt og eit halvt år sidan. Korona-restriksjonane har skulda for det.