I ein video publisert av sin eiga klubb, Adelaide United, innleiar Cavallo med å seie at han er fotballspelar og at han er homofil.
Det har vore ein lang veg dit.
– Eg har kjempa mot seksualiteten min i over seks år no, og eg er glad for at eg kan leggje det til side, fortel Cavallo tydeleg rørt.
Levde eit dobbeltliv
Då han vaks opp, trudde han at han ikkje kunne nå draumen om å bli proff fotballspelar, samstundes som han var skeiv. Difor skjulte han legninga si i mange år.
STÅR FRAM: Josh Cavallo.
Foto: Brendon Thorne / AP– Eg skamma meg, og trudde at folk ville behandle meg annleis om dei fann det ut, eller at dei ville seie slemme ting og gjere narr av meg, seier han.
Per no er det berre eit fåtal mannlege fotballspelarar som har stått fram som skeive. Collin Martin, som spelar i andredivisjon i MLS og Phuti Lekoloane, i tredjedivisjon i Sør-Afrika, er to som har stått fram som homofil, of som framleis spelar aktivt.
No orkar ikkje Cavallo meir.
– Eg er trøytt av å prøve å prestere på toppnivå og leve dette dobbeltlivet. Det er utmattande og noko eg ikkje ynskjer at nokon andre skal få erfare, seier han.
- Les også:
Veit om fleire
Etter at han dela nyhenda med omverda, fortel han at han har fått meir respekt.
– Å kome ut til familien min, venner, lagkameratar og trenarar, har vore fantastisk. Det har fått meg til å undre på kvifor eg har skjult denne byrda så lenge, seier han.
I tillegg til å snakke ut i ein video gjennom klubben sine kanalar, har han også publisert ein pressemelding på sine eigne sosiale medium. Der fortel han at han veit at det er fleire fotballspelarar som lever i skjul.
– Det er overraskande at det ikkje er andre homofile fotballspelarar som speler aktivt akkurat no, ikkje berre i Australia, men rundt om i verda, seier han og held fram:
– Eg vil vise dei der ute som slit og som er redde, at du ikkje treng å vere nokon andre. Det er OK å vere homofil og spele fotball, seier han.
Det ønskjer spelaren å gjere noko med. Det er òg noko av grunnen til at han no vel å stå fram om legninga si.
– Å vekse opp som homofil samtidig som eg speler fotball, er to ulike verder som ikkje har kryssa lagnader før. Eg vil vere med å endre dette, og vise at alle er velkommen i fotball. Alle fortener retten til å vere seg sjølv. Eg håpar dette vil endre seg i nær framtid, seier han.
Eit viktig signal
Inge Alexander Gjestvang, leiar i foreininga for kjønns- og seksualitetsmangfold (FRI), blir glad for å høyre at nok ein fotballspelar vel å stå fram.
– Det er mykje symbolikk og ein viktig signaleffekt når vi har folk som kjem frå slike miljø og seier kven dei er. Det er gode signal for dei yngre i breiddeidretten som er usikre på om det er plass til dei på fotballaget, eller om dei skil seg ut, seier Gjestvang til NRK og held fram:
– Ein blir alltid glad for at folk finn ut kven dei er og kven dei blir kjær i. Det er noko av det viktigaste som er i verda.
Assistenttrenar i Adelaide United, Ross Aloisi, beundrar spelaren sin.
– Då eg snakka med Josh tidlegare, var det tydeleg at han levde med ei byrde og ei smerte. Når eg ser på Josh i dag, så er han mange kilo lettare. Det gjer meg stolt å sjå kor modig han er, seier Aloisi og held fram:
– Josh si mentale helse og velvære er det viktigaste for oss, som trenarar og lagkameratar. Josh vil alltid vere Josh for oss, avsluttar han.
