Han er mannen som aldri gir seg. Vidar Nisja er spelaren på utegåande kontrakt, men som likevel nok ein gang blei helten for Viking.

Tre minutt før slutt bomma Glimt-forsvarar Vieux Sane på ei klarering inne i feltet. Ballen spratt vidare til innbyttar Nisja som kontant putta ballen bak Glimt-keeper Pavel Londak til ellevill jubel i Stavanger.

Samstundes stoppa han Bodø/Glimts elleville sigersrekke med seks sigrar på rad.

– Det var deilig å komme frå benken og vere med på å snu kampen, og i tillegg score det avgjerande målet, seier Nisja til C More etter kampen.

Det gav tre nye poeng og fotball-feber i Stavanger etter fleire tunge år.

For no har byen eit fotball-lag som er i form og som i tillegg overnattar på bronseplass i eliteserien før Vålerenga møter Rosenborg på Lerkendal i morgon kveld.

Samstundes er klubben i semifinalen i cupen. 2015 kan bli eit Viking-år.

To lag i form

Men det var Bodø/Glimt som første sjokkerte i siddis-byen.

Ti minutt etter pause på Viking stadion sendte Alexander Sørloth ein nydeleg stikkar gjennom til Fitim Azemi.

Den tidlegare Follo-angriparen vippa deretter ballen elegant over Viking-keeper Iven Austbø og i motsatt hjørne.

Det kunne gitt Glimt lagets sjuande siger på rad i eliteserien.

Men berre seks minutt seinare utlikna Andre Danielsen frå straffemerket etter at Glimt-keeper Pavel Londak hadde felt Jon Dadi Bödvarsson

Så blei Nisja den store helten tre minutt før slutt.

– Det var herlig. Vi gjør ingen bra kamp, men klarar til slutt å ta tre poeng, seier Viking-trenar Kjell Jonevret.

Det var to lag i kanonform som møttes i Stavanger på Viking stadion. Viking kom til kampen med fem sigrar og to tap på dei sju siste og har spelt flott angrepsfotball denne sesongen.

Samtidig har Bodø/Glimt kjempa seg ut av nedrykkstriden med seks sigrar på rad før kveldens tap mot Viking.