Fakta: Sunderland - Manchester City 1-0
Den tidlegare Manchester United-spelaren avgjorde kampen etter 22 minutt.
Bardsley sneik seg inn bak City-forsvaret, og gjekk sigrande ut i duell med Aleksandar Kolarov, før han skrudde ballen forbi Costel Pantimilon og i mål.
City, som låg seks poeng bak serieleiar Arsenal før den 11. serierunden, pressa hardt på for utlikning, men Sunderland drog 1-0-sigeren i land.
Det blei tre svært viktige poeng for Sunderland som slit heilt i botnen av Premier League. Sigeren sende dei opp i sju poeng, tre poeng framfor Crystal Palace på siste plass.
United-back erklært uønskt
For matchvinnar Bardsley blei sigeren mot City ein etterlengta opptur.
I sommar blei han nemleg erklært uønskt av dåverande Sunderland-sjef Paolo Di Canio, men Bardsley er teken inn igjen i varmen av Gustavo Poyet.
Onsdag scora han då Sunderland tok seg til kvartfinale i ligacupen, og mot City i serien blei det ny scoring.
I tillegg blei sigeren kanskje ekstra kjekk for Bardsley. Høgrebacken er født og oppvaksen like ved Manchester United si heimebane Old Trafford. Han starta også karrieren i klubben.
(NRK/NTB)