Med kampen Sheffield United - Notts County opnar The Football League jubileumsesongen sin fredag.
Seks kampar i sesongstarten skal markere at det i år er 125 år sidan dei aller første ligakampane gjekk av stabelen.
Det var 8. september 1888 at det begynte, det som skulle bli ei verdsomspennande "oppfinning": Liga-systemet i fotball, der alle møtte alle i ein fast oppsett speleplan.
Det systemet held stand enno, med berre relativt små endringar i desse 125 åra.
Den engelske ligaen skal markere dette med å gje to kampar i kvar divisjon status som jubileumskampar. Desse kampane vart sette opp før datamaskina sette opp terminlista i juni.
Jubileumskampane er plukka ut på bakgrunn av historikken til ligaen. Sju av laga er blant dei 12 som var med i den aller første sesongen.
Kjem tett på klubben
– Vi merkar at det er ein klubb med svært lange tradisjonar, seier Henning Mathisen til NRK.no. Han er leiar av Burnleys norske supporterklubb, ein klubb med 75 registrerte medlemmer.
– Vi merkar det på at det blir snakka om dei gamle heltane frå dei store sesongane, og ikkje minst fordi fleire av dei er i byen og klubbmiljøet enno. Sjølv kjenner eg nokre av dei ganske godt. Di kjem tettare innpå folk i ein mindre klubb enn i dei store i Premier League, seier Mathisen.
Burnley er ein av klubbane som skal arrangere offisiell jubileumskamp. Dei møter lokalrival Bolton heime på Turf Moor laurdag.
– Det er ikkje den verste lokalrivalen. Vi har høgare derbyfaktor i kampane mot Preston og Blackburn, seier Mathisen. Begge desse er forøvrig også klubbar med ligahistorie heilt tilbake til starten i 1888.
– Vi skal ikkje over til opningskampen, vi skal i staden til kampen mot Blackburn 14. september, seier Mathisen.
– Ikkje utan sjeik eller russar
Burnleys bane Turf Moor er ei av berre tre baner som har vore i bruk til ligafotball heilt sidan starten. Den har tatt imot opptil 54.775 tilskodarar (mot Huddersfield i FA-cupen i 1924). Burnley har ligameisterskap frå 1921 og 1960 og FA-cup-triumf frå 1914 å vise til.
– Kan Burnley bli eit topplag igjen?
– Nei, det er tvilsamt. Vi kan nok kome oss opp i Premier League og bli der eit par år, men neppe meir enn det. Med mindre det kjem ein sjeik eller ein russar og kjøper klubben, seier Mathisen.
Premier League er ikkje med i jubileet. Som kjent har øvste nivået i engelsk fotball vore ein eigen organisasjon sidan 1992. Dagens Football League består dermed av tre divisjonar - Championship, League One og League Two.
Her er den historiske menyen for jubileumsmarkeringa når årets ligasesong tek til første helga i august:
Championship
Burnley - Bolton: Burnleys bane Turf Moor er ei av berre tre baner som var i bruk i 1888/89, og som framleis er i bruk i The Football League. Lancashire-rivalane Burnley og Bolton har møtt kvarandre i ligasamanheng 114 gonger, og Burnley har faktisk blitt ligameister to gonger – i 1921 og 1960. I 1920-21 gjekk dei 30 kampar utan tap, ein sesongrekord som sto i over 80 år.
Burnley er forresten eitt av berre tre lag som har vunne alle fire divisjonane i ligaen. Dei to andre er Preston og Wolverhampton.
Tilsvarande kamp i første sesong: 4-1 (6. oktober 1888)
- Se:
Derby - Blackburn: På Pride Park i Derby møtest søndag to klubbar som til saman har blitt ligameister fem gonger. Derby vann i 1972 og 1975, Blackburn i 1912, 1914 og 1995 (Premier League). Også begge desse klubbane var med i1888 då det heile starta.
Blackburn heldt seg elles i øvste divisjon i ligaen samanhengande heilt til 1936 – lengst av alle 12 som var med frå start, saman med Aston Villa, som også rykka ned det året.
Tilsvarande kamp i første sesong: 0-2 (24. november 1888)
League One
Preston - Wolverhampton: Prestons bane Deepdale er også ei av banene som har vore i bruk sidan 1888. Her vart det faktisk spela kamp på sjølve premieredagen 8. september – Preston "The Invincible" opna med 5-2 over Burnley. Preston gjekk gjennom serien utan tap den sesongen, samstundes som dei vann cupen utan baklengsmål (etter mellom anna 3-0 over Wolves i finalen). Dei vann ligaen også året etter, men har aldri gjort det sidan. Deepdale har vore arena for 2342 ligakampar opp gjennom åra - fleire enn noko anna bane.
Motstandar Wolverhampton var også med frå starten, og vann ligaen tre gonger på 1950-talet.
Tilsvarande kamp i første sesong: 5-2 (27. oktober 1888)
Sheffield United - Notts County: Her er det mykje fotballhistorie. Den eldste eksisterande fotbaklubben i verda skal på besøk til verdas eldste bane for profesjonell fotball, Bramall Lane (opna 30. april 1855).
Notts County – stifta i 1862 – var også ein av dei 12 originale ligamedlemmene, Sheffield United kom ikkje inn i ligaen før i 1892. Men medan Sheffield United har eitt ligameisterskap (1898), har aldri Notts County vunne ligaen.
Første tilsvarande ligamøte: 0-1 (19. februar 1898)
Det er denne kampen som opnar The Football League 2013/14 - fredag 2. august kl 20.45.
- Se:
League Two
Newport County - Accrington Stanley: Her er vi i den andre enden av historieskalaen. Denne kampen går på ligaens nyaste arena hos den ferskatse klubben. Rodney Parade heiter bana, og Newport County er nyopprykka via playoff i Conference i vår.
Den walisiske klubben er rettnok ikkje utan ligakontakt frå tidlegare. Gamle Newport County rykka ut av ligaen på slutten av 1980-talet og gjekk konkurs.
Motstandar Accrington Stanley har også solide historiske band, ettersom Accrington FC var med blant dei 12 opprinnelege klubbane. Men Stanley har berre bynamnet felles med den gamle klubben.
Har aldri møtt kvarandre lidlegare.
Rochdale - Hartlepool: På Spotland i industribyen Rochdale skal heimelaget møte Hartlepool for 137. gong. Ingen andre av dei noverande ligaklubbane har møtt kvarandre oftare enn det.
Bortsett frå det, har desse klubbane har desse klubbane spela ei beskjeden rolle i ligahistorie - alltid i ein av dei to lågaste divisjonane. Rochdales største prestasjon er finaleplass i ligacupen i 1962. Hartlepool er vel mest kjend som klubben der Brian Clough begynte sin manager-karriere.
Første tilsvarande møte: 0-1 (14. januar 1922)
- Se: