– Her er det ein annan kultur, nytt språk, andre land og nye menneske. Det handlar litt om det å gå utanfor komfortsona, og det kjenner eg at eg gjer no, seier Haavi til NRK.
Roma stadfesta nyheita på sine nettsider onsdag.
Opphaldet i Roma blir det andre utanlandseventyret hennar i karrieren, og ho håpar det blir betre enn første. I 2017 gjekk nemleg ikkje opphaldet i Boston Breakers som planlagt. Ho sleit med skadar og hadde dessutan heimlengsel.
Men denne gongen blir det annleis, trur ho.
– Eg var ganske mykje yngre, og eg var òg mykje skadd, og det sette preg på opphaldet. Men det er utviklande å vere utanfor komfortsona, og det fekk eg kjenne på då. Og eg tippar det vil kjennast sånn no òg, seier den ferske Roma-spelaren og held fram:
– Samtidig er det herleg å vere på ein stad i livet der ein er trygg på seg sjølv, kven ein er og kva ein står for. Eg har meir ro i kroppen denne gongen, samanlikna med sist.
– Einsamt blir det sikkert
Ho har vore i Toppserien til saman 14 år, der ni av dei har vore i LSK Kvinner. Ho innrømmer at det er litt skremmande, men ho trur òg det vil utvikle ho som menneske og fotballspelar.
– Det er sjølvsagt litt skummelt, men eg trur det vil vere veldig utviklande for meg som person og som spelar, det å vere i eit nytt miljø og verkeleg måtte prestere og vise kva ein står for. Skummelt, men veldig kjekt.
Og heimlengsel trur og håpar ho at det ikkje blir noko av denne gongen.
– Vegen er kortare frå Italia, og det vil gjere det mindre skummelt. Eg var så langt vekke at eg kjendest som eg levde i ein anna verd. Då eg var vaken var ingen i Noreg vakne, og når ein i tillegg er skadd og ute av laget så blir ein isolert. Det vart ganske tøft, seier Haavi.
– Fryktar du heimlengsel, no som korona har blussa opp igjen?
– Det kjem det sikkert til å bli. Eg hadde kanskje trudd at korona ikkje skulle bli ei utfordring då eg valde å reise, så det er kjipt. Men tanken på at ein er tre timar heimanfrå gjer det lettare. Einsamt blir det heilt sikkert, men då lærer ein av det, seier ho.
Fekk råd av Hegerberg
Men med nytt land og ny kultur kan det vere greitt å søkje råd. Ho fortel at ho mellom anna har snakka med tidlegare Roma-spelar Andrine Hegerberg.
– Eg har snakka litt med Andrine, særleg då Roma vart veldig aktuelt. Eg fekk eit godt inntrykk. Det er sjølvsagt ting som er annleis her, men det var derfor eg valde å reise. Då har ein ikkje kontroll på alt heile tida, og det har eg litt godt av, meiner 29-åringen.
– Kva råd fekk du?
– At ein må reise hit med ope sinn, for det er ein annan kultur her, med tanke på tid, mat og måltid. Klokka 12 her er ikkje nødvendigvis klokka 12 som eg er vand til.
Ein god start kan vere å lære seg språket. Der fortel Haavi at ho har litt å gå på.
– Italiensken min på ein skala frå éin til ti: Éin. Men eg har prøvd meg litt, sidan eg har visst ei stund at det var hit eg skulle. Eg har lasta ned ein app, der eg øver litt kvar dag. Men det er eit vanskeleg språk, flirer ho.
Roma ligg på andreplass i den italienske serien, og dei ligg dermed an til å nå meisterligaen neste sesong.
Før ho kjem ordentleg i gong skal ho heim til Noreg søndag og feire jul med familien. Frå og med 27. desember startar det for alvor.