Det kunne sjå ut som svenske tilstandar på Oslos austkant i timane før kampstart, men det tok fullstendig av då Osame Sahraoui sette i gang maskineriet.
VIFs angrepsspelar har no scora seks mål på dei siste sju kampane, og sikra at Vålerenga kom best ut av hatoppgjeret på heimebane.
– Det betydde mykje. Eg har hatt mange bra kampar, men eg trur eg kjem til å hugse denne bra. Det er heilt ubeskriveleg, seier ein lykkeleg Sahraoui etter kampen.
21-åringen frå Vålerenga er stort sett audmjuk, men kjem med eit stikk til kritikarane etter monster-framferd føre eit fullsett stadion.
No fryktar Fagermo at Sahraoui blir selt etter sesongen.
Svarar kritikarane
Angrepsspelaren er lykkeleg etter å ha endeleg opna målkontoen for fullt. Tidlegare denne sesongen har han fått kritikk for å ha skapt lite målpoeng.
SENKA RIVALEN: Osame Sahraoui.
Foto: Annika Byrde / NTB– Er du i din livs form?
– Eg er berre 21 år gammal, så i min livs form er eg vel ikkje enno. Men kanskje så langt i livet, med tanke på at eg har fått dei tre målpoenga eg har blitt kritisert for heile tida, seier Sahraoui til NRK.
Han røper at han gjerne skulle ha scora hat trick.
– Eg tenkte berre på å få det tredje målet. Eg ville gjerne ha hat trick, seier han og held fram:
– Eg tykkjer eg fortener det, etter å ha stanga litt imot. Det er ei fantastisk kjensle.
Skal ha godt betalt
Han takkar teamet rundt seg, fansen og familie for den store utviklinga i spelet. Hovudtrenar Dag-Eilev Fagermo har vore klar på at den store utfordringa til eleven var å ta målpoeng.
– Han er noko heilt spesielt, men mål og målpoeng har vore ei utfordring. No har det verkeleg lausna, seier Fagermo til NRK.
BESTE KJENSLA: – Vi er gode og vi slår erkerivalen. Eg kan ikkje ha det betre, seier Fagermo etter sigeren mot LSK på heimebane.
Foto: Annika Byrde / NTBHeld Sahraoui fram med den gode trenden, trur Fagermo at dei verkeleg store klubbane bankar på døra i overgangsvindauget i januar.
– Ja, det trur eg. Det må vi rekne med. Det kjem nye, større klubbar enn det var i sommarvindauget.
– Det kan skje i januar, for vindauget då er nok litt annleis på grunn av Qatar-VM. Eg trur det blir meir shopping i dei store ligaene, enn det normalt er. Då kan Sahraoui vere ein som ryk, seier Fagermo.
– Kor stor er prislappen?
– Det er vanskeleg å seie, men held han fram slik som dette, og vi ser utviklinga på prisane i norsk fotball, så skal vi ha godt betalt for han.
– Snakkar vi rundt 40–50 millionar?
– Ja, det ser eg ikkje vekk ifrå. Han er framleis ung, men klubbar vil ha unge, talentfulle spelarar, seier Fagermo.
– Magisk
16.555 møtte opp på stadion for å sjå kampen mellom Lillestrøm og Vålerenga, og det var heimelaget som starta best.
Nemnde Sahraoui var mannen som sende VIF i leiinga med ei perle av eit skot, som hamna i lengste kryss. Det fekk supporterane til å fyre opp blusset, og TV-bileta var tidvis vanskelege å tyde ut frå all tåka.
KOKTE: Vålerenga hadde verkeleg den 12. mann på tribunen.
Foto: Annika Byrde / NTBSpiss Torgeir Børven scora dagens andre, etter ein målgivande pasning frå ungguten.
Tredje scoring var Sahraouis, og difor blei det heller ingen tvil om kven som vart kåra til banas beste i denne kampen.
– Den vesle magikaren er ustoppeleg denne hausten. Han mosar den opp i nettaket, kommenterte Eurosports Kenneth Fredheim då hans andre mål for kvelden var eit faktum.
Kort tid før hans andre mål, hadde Lillestrøm redusert og var på veg inn att i kampen.
– Dette har vore ein magisk framferd frå den vesle trollmannen. Han har styrt det meste her ute i kveld, sa Eurosports Christian Gauseth.
