Aksjonen i går var ein demonstrasjon mot det palestinarane meiner er ulovleg bustadutbygging som mellom anna gjer livet stadig vanskelegare for palestinsk fotball.
FIFA-styret skal behandle konflikten på sitt møte i slutten av denne veka.
Seks israelske fotballklubbar held til på den Vestbreidda, som ifølgje FN er ulovleg okkupert land. Israel har hatt kontroll over Vestbreidda sidan krigen i 1967. Sidan har over 700.000 israelarar busett seg der, ifølgje tal frå Human Rights Watch.
Krev at klubbane blir flytta
Palestina er medlem av FIFA, og har kravd at dei israelske klubbane må flyttast ut av det okkuperte området.
– Infantino, let us play, ropa dei unge fotballspelarane, med adresse til FIFA-president Gianni Infantino.
Det var gutar mellom 11 og 15 år som i går marsjerte inn mot den israelske landsbyen Maale Adumim på Vestbreidda for å spele fotball – ein landsby som har vakse til 40.000 innbyggjarar.
Men dei vart stansa av soldatar og politi i det dei skulle gå inn på området.
– For meg har det prioritet å finne ei løysing på dette spørsmålet, sa Infantino til AFP for nokre dagar sidan.
– Eit fotballspørsmål som har blitt politisk
Human Rights Watch har bedt FIFA-presidenten om å rydde opp. FIFA har sett ned eit utval som skal greie ut om desse problema.
– Dette er eit fotballspørsmål som har blitt politisk. Vi har enno ikkje funne ei god løysing på det, men det trur eg vi skal, seier Infantino før møtet der problemet står på saklista.
Gutane kom frå område som risikerer øydelegging og tvangsflytting som følgje av nye israelske bustadområde.
– Kvifor kan de ikkje la dei får spele fotball her? spurde Fadi Quran frå den palestinske gruppa Avaaz.
– Dei kan spele kvar dei vil, berre ikkje her i Maale Adumim, svara ein av dei israelske tryggingsfolka.
Kan krevje Israel kasta ut av FIFA
Det palestinske fotballforbundet har tidlegare klaga til FIFA over vanskane israelske tryggingstiltak gjer når fotballspelarane skal reise til og frå kampar og trening. Ofte kjem spelarar for seint, eller ikkje får ikkje spele i det heile.
Forbundet kritiserer også FIFA for å tillate at israelske lag får spel på «land som internasjonalt er rekna som okkupert».
Israel på si side skuldar Palestina for å tekkje fotballen frå bana og inn i politikken. – Fotball skal føre folk saman, ikkje splitte dei, er svaret frå Israels fotballforbund.
Dima Yousef, som spelar på Palestinas kvinnelag, seier det slik:
– Vi er ikkje ute etter å hindre israelarane i å spele fotball. Men vi vil at det internasjonale samfunnet skal vite at det ikkje er rett for (ulovlege) nybyggjarar å spele fotball på land som ikkje er deira.
Dersom møtet denne veka ikkje kjem fram til ei løysing som det palestinske fotballforbundet kan godta, vil Palestina truleg ta opp att forslaget om å sparke Israel ut av FIFA.