«Det var eit gutesprell. Andre er meir opptekne av det enn vi»

– Eg har lest litt om det her og der. Men eg vil ikkje seie at det det påverkar meg, seier Johannes Thingnes Bø til NRK.no

Han har dei siste dagane vore i vinden som følgje av eit stunt saman med Emil Helge Svendsen, der karane blotta seg for Tora Berger under eit renn i verdscupen. Episoden vart fanga av eit kamera frå tyske ARD.

• LES MEIR: Svendsen viste «alt» for Tora: – Hun likte nok det hun så

Onsdag var det sportslege prestasjonar som skulle vere i fokus. For med sterke namn som Emil Hegle Svendsen, Ole Einar Bjørndalen, Henrik L'Abèe Lund og Tarjei Bø borte frå startstreken, var det duka for eit oppgjer om NM-gullet blant dei nest beste på normaldistansen - og her var stryningen ein av favorittane.

(Artikkelen held fram under videoen)

Ni bom på standplass

Men med ni bom på standplass enda han på 28. plass - nøyaktig sju minutt bak den uventa vinnaren Vegard Bjørn Gjermundstad frå Alvdal.

– Det vart eit stykke ned på lista. Men når ein ikkje har dagen på standplass, og ikkje har kontroll, då blir det vanskeleg. Det er umogleg å gå inn ni minutt, seier Thingnes Bø til NRK.no.

Thingnes Bø er likevel ikkje skuffa over NM-starten. Han meiner det gjekk bra i sporet. Det lovar bra for resten av NM, meiner han.

– På første ståande var det verkeleg ille. Ein skulle tru at eg ikkje hadde skote ståande før. Eg gjekk såpass greitt i sporet, at eg har tru på resten av NM. Får håpe eg skyt betre, så får vi sjå korleis det går, seier Thingnes Bø.

(Artikkelen held fram under biletet)

– Blottinga øydela ikkje

Overfor NRK.no avviser han at oppstusset rundt blotteepisoden saman med Emil Hegle Svendsen har påverka han i dagane fram mot NM.

– Vi gjorde eit sprell, og det var moro. No har vi lagt det bak oss, seier Thingnes Bø.

Men det er det ikkje alle som har gjort. På Dombås var Thingnes Bø i medias søkjelys. «Alle» ville snakke med den unge stryningen om nakenstuntet i Khanty Mansiysk.

Sjølv tar han det heile med stor ro. Og eit glis om munnen.

– Det var ein gutespøk, og eg trur vel andre har vore meir opptekne av det enn vi, seier han.

• LES OGSÅ: Håpar å avslutte sesongen med gull
• LES OGSÅ: - Glimrande ironisk handling

Dårleg for løparane frå fylket

Håvard Gutubø Bogetveit vann NM-gull for juniorar tidlegare i vinter, men måtte ta til takke med ein 14. plass når han i dag stilte opp mot seniorane i NM på Dombås.

Med fem tilleggsminutt, tre på liggjande og to på siste ståande, hamna junioren frå Førde fire minutt og 34 sekund bak vinnaren, Vegard Bjørn Gjermundshaug frå Alvdal (ein bom), som også han er junior. Lars Helge Birkeland frå Birkenes (to bom) og Dag Erik Kokkin frå Åsnes (ein bom) tok dei neste plassane.

Gutubø Botetveit vart med det beste løpar frå Sogn og Fjordane.

– Dagsformen var ikkje heilt på topp i dag. Og fem bom var i meste laget til å kunne hevde seg i toppen. Eg trur ein topp ti-plassering er innan rekkjevidde på sprinten, seier han til NRK.no.

– Eg skal angripe og vere offensiv, understrekar han.

(Artikkelen held fram under biletet)

Slik gjekk det med dei lokale

Også dei andre løparane frå Sogn og Fjordane skuffa på standplass og hamna lenger ned på resultatlistene:

• 35. Jarle Midthjell Gjørven, Markane IL, sju bom.
• 48. Asbjørn Wold, Vik IL, ni bom.
• 53. Ole Martin Erdal, Førde, ti bom
• 65. Anders Vonheim, Markane IL, ni bom.