Køyrer du snøskuter i fjellet, så må du vere klar over reglane.
Elles kan det bli dyrt.
– Statens naturoppsyn lovar snøskuterkontrollar gjennom heile påska i fjellet i Agder, seier fungerande tilsynsleiar Ole Morten Sand.
- Er du interessert i å lese om aktivitet i fjellet? Då vil du kanskje lese denne saka om villrein.
Reagerer på tips frå folk
Nyleg fekk fem personar nesten 30.000 kroner kvar i bot for ulovleg snøskuterkøyring i verna naturområde i Setesdal og Sirdal og for å unndra seg kontroll.
– Vi får tips og meldingar om ulovleg motorferdsel, og prøver å følge opp så godt vi kan. I tillegg har vi lokalt SNO som har ei god føling på kvar skoen trykker verst, seier Sand.
Naturoppsynet ber folk følgje reglene slik at ein unngår at dyr blir skada.
– Kor viktig er dialogen med publikum?
– Kjempeviktig. Vi ønskjer gjerne at folk tar kontakt med oss om dei har mistanker om lovbrot. Vi har ei eiga tipsløysing på nettsida til direktoratet. Då får lokalt SNO varsel om det, og kan ta grep ut frå tipset, seier han.
Statens naturoppsyn melde over 60 snøskuterførarar for ulovleg køyring i fjor.
Kan bli dyrt
Ifølge naturoppsynet er det mange hytteeigarar som har fått løyve til å køyre opp til hytta si.
Dei kan likevel bli stoppa når det er kontroll. Brot på lova blir melde til politiet.
– Sånn må det vere viss til dømes åtferda skremmer villrein. Det er ekstra viktig at villrein og simler med kalv får ro, understrekar han.
– Har de forståing for at nokon synest det er irriterande å bli stoppa ofte?
– Vi høyrer om skuterførarar som har løyve til å køyre, som synest det kan vere litt irriterande å bli stoppa dagleg av sånne kontrollar. Men dei fleste set pris på at dei blir kontrollerte og at dei har ting i orden, seier Sand.