– Den førebelse obduksjonsrapporten konkluderte med at jenta døydde av drukning. Det er også konklusjonen etter at den 14 år gamle guten har erkjent å ha teke livet av henne, seier lensmann Terje Pedersen til TV2.
NRK har førebels ikkje lukkast i å komme i kontakt med nokon i politiet si etterforskingsgruppe fredag ettermiddag.
Drepen av jamaldring
Den 14 år gamle jenta vart funne død i Søgneelva laurdag 29. august. Då sa politiet at dei ikkje hadde mistanke om at det hadde skjedd noko kriminelt med 14-åringen.
Nesten to veker seinare informerte politiet pressa om at ein jamaldrande gut har erkjent å ha drepe 14-åringen.
Politiet har førebels ikkje ville seie noko om motivet for drapet. Men dei sa på pressekonferansen torsdag kveld at det hadde vore usemje mellom dei to.
Det er gjort funn på åstaden ved Søgneelva, som stemmer med opplysningane som guten har gitt til politiet i avhøyr.
Involvert i skyteepisode
Fredag føremiddag kom det fram at den drapsmistenkte 14-åringen tidlegare har vore i kontakt med både politi og barnevern.
I april i fjor var guten involvert i ein episode er ein annan 14-årig gut vart treft av eit vådeskot med hagle. Før dette hadde 14-åringen og to jamaldrande teke seg inn i eit hus der dei stal tre hagler og ammunisjon.
