– Vi har Sup & Stup i juli. Så har vi LillesandsDa'ene som går over ei veke, seier den ferske kultursjefen i Lillesand kommune, Toffen Gunnufsen.
I Lillesand skjer det mykje om sommaren. Men kulturlivet er også rikt utanom sommarsesongen, meiner kultursjefen.
Ei omstridd tilsetting
Da det blei offentleggjort at 62-åringen fekk jobben som kultursjef, var det ikkje berre applaus å få.
At «festival-legenda» var den av 19 søkarar som fekk jobben, har blitt kritisert. Blant anna har fleire personar frå kulturmiljøet i Lillesand delt misnøya si i Agderposten.
Noko av kritikken går ut på at dei meiner bakgrunnen hans frå kulturlivet ikkje er brei nok med tanke på kva ein kommune skal tilby.
Gunnufsen svarar at jobbing med musikkfestivalar slett ikkje berre handlar om å jobbe med musikk.
Frå den bransjen har han 30 års erfaring.
Han var med på å arrangere både Hovefestivalen på Tromøya i Arendal og Skral i Grimstad.
Men mest kjent er han kanskje for dei 15 åra sine i Quartfestivalen i Kristiansand.
Podkasten «Quarten – skandalefestivalen» finn du nedst i artikkelen.
Ny overskrift
Innbyggarar i Lillesand har nokon tankar om kva dei håpar av den nye kultursjefen.
– Eg håpar han kan halde ved lag eit vidt spekter innan kultur. Det gjeld både klassisk musikk, kulturskolen og korlivet, seier Anne Gerd Monstad.
Litt lenger nede i gata finner vi Stian Tungland på kafeen han er dagleg leier for.
Han trur det er ein fordel at Gunnufsen er profilert og har vore i «gamet» lenge.
– Eg håpar han kan sette Lillesand på kartet, og at han opprettheld tilbodet av kunst og kultur lokalt, seier Tungland.
Vil gjere det enklare
Etter berre nokre dagar i jobben har Gunnufsen klare tankar om kva han vil gjere.
– Eg håpar å kunne legge til rette for at folk kan komme til byen, og at det skal vere lett å arrangere ting her.
Han fortel om korleis dei før i tida opplevde å måtte gå gjennom mange instansar for å sette i gang arrangementa sine.
– Her skal vi legge til rette for at det er enklast mogleg å komme med gode idear.
Gunnufsen trur det kan vere vanskeleg for folk å finne ut av kva som eigentleg skjer i kommunen.
– Det må eg prøve å få løfta fram da, seier han.