Stor nedgang i import av varer

– Folk kjøper mindre, og det byrjar dei store importørane å merke, seier hamnesjef i Kristiansand Atle Kristian Johannessen.

Kristiansand Konteinarhamn er ein av Noreg sine største, men no er nedgangen i trafikken merkbar.

I importhamner langs heile Oslofjorden er tendensane dei same. Sidan nyttår har det vore ein nedgang i konteinartrafikken på mellom 20 og 30 prosent.

– Det kan bli eit sjokk om dette utviklar seg, og det kan bli ein bråstopp, seier Johannessen.

Sel mindre klede, sko og konsumvarer

Nedgangen i konteinartrafikken reflekterer nedgang i import av varer til Noreg.

Klede, sko og konsumvarer har hatt eit kraftig fall sidan i fjor.

– Det heng saman med at det går svakare i norsk økonomi. Veksten har stoppa opp, seier Øystein Dørum, direktør samfunnsøkonomi i NHO.

Han peikar på at fallet kjem litt av at vareforbruket hadde ein kraftig auke i pandemiåret 2020. Når økonomien vart opna opp, gjekk forbruket frå varer til tenester.

– Det kjem også av at me får dårlegare råd. Reallønna har gått ned, i tillegg har me fått renteaukar på toppen. Alt dette heng saman, seier Dørum.

Nedgang i tungtransport

Også langs vegane merkar ein at nordmenn handlar mindre varer.

Transportøkonomisk institutt har registrert ein nedgang i tungtransport i alle landsdelar.

– Dette er jo ønskt frå Noregs Bank. Dei ønskjer å dempa den samla etterspurnaden i økonomien, seier samfunnsøkonom ved Universitetet i Agder, Kjetil Andersson.

At ein reduserer kjøp av varer og tenester frå utlandet er naturleg, meiner han.

Dørum peikar også på at det er eit ønskt utvikling, men peikar også på at utviklinga er uønskt fordi den norske krona er svakare, som igjen gjer importen dyrare.