Skal finne årsaka til jordbærkrisa

– I løpet av sommaren skal vi ta naudsynte prøver. Resultata får vi litt ut på nyåret. Vi håpar det skal vere nok til å formidle kunnskap om situasjonen til neste sesong, seier statssekretær i Landbruks- og matdepartementet Terje Halleland (Frp) til NRK.

Tidlegare denne veka hadde Landbruksdepartementet eit møte med Bondelagdet og Agder Bær om jordbærkrisa.

Der fekk bøndene eit nytt nei til økonomisk erstatning.

• Les: Advarer mot ny fruktflue

Milliontap for jordbærbønder

Soppen gråskimmel har øydelagd jordbær for fleire millionar kroner. Nokre jordbærbønder anslår at så mykje som 80 prosent av bæra er øydelagde.

Gråskimmelen vart først registrert i Agder og Rogaland. Seinare har den spreidd seg også til andre fylke.

Ekspertar og bønder fryktar at soppen er resistent mot sprøytemiddel. Det er dette dei no skal finne svar på.

Det er Norsk institutt for bioøkonomi (NIBIO) og Norsk Landbruksrådgivning som skal stå for undersøkinga. Dei skal ta prøver frå kring 20 ulike jordbæråkrar på Agder.

– Vi ventar endeleg svar på om soppen er resistent i januar eller februar, seier Halleland.

– Kva skjer om det viser seg at soppen er resistent mot sprøytemiddel?

– Då må vi ha andre sprøytemiddel. Det må bli litt av svaret slik at produsentane kan få ei fagleg tilbakemelding på bruk av plantevernmiddel, og korleis ein skal gå fram vidare, seier han.

• Les: Har funnet en mulig løsning på jordbærproblemet

Sa nei til tiltakspakke

Både Arbeidarpartiet og Senterpartiet har bede Landbruksministeren om ei ekstraordinær tiltakspakke til jordbærbønder som er råka. Dette har landbruksminister Jon Georg Dale sagt nei til.

– Sopp er ein risiko som følgjer med desse produksjonane, og det må produsentane sjølv ta, sa Dale tidlegare i sommar.

Det blir heller ikkje løyvd ekstra pengar forskingsprosjektet.

– Det er nok snakk om omdisponering av tidlegare løyvde pengar til NIBIO, seier Halleland.

Det pågår allereie liknande undersøkingar i Hedmark, Oppland, Møre og Romsdal og Sogn og Fjordane. No vert også Agder-fylka inkludert.

• Les: Jordbærprodusent: Folk blir redde for å kjøpe bær