– Det var eit sjukt tal. Eg visste det var mange medaljar, men at det var så mange visste eg ikkje, seier Vipers-spelar Marta Tomac i mektige Arena Stožice i Ljubljana.
– Det er ein god gjeng eg trenar med. Alle saman er heilt vanvitig gode. Det er mange å sjå opp til og lære av, seier Vipers-talentet Tuva Høve (21), som førebels har ein medalje på seniornivå.
Marta Tomac er overraska over kor mange medaljar spelarane i Vipers har sanka gjennom åra.
Foto: Sander Heggheim / NRKTrur det er endå fleire medaljar
Vipers er i Slovenia der dei møter Krim i kvartfinalen i meisterligaen søndag.
I den forbindelse gjorde NRK eit tappert forsøk på å telje opp kor mange medaljar spelarane og trenar Ole Gustav Gjekstad har til saman.
Det viste seg å bli ei nærast umogleg oppgåve.
Vi enda på over 200. Då har vi teke med OL-, VM-, EM-, meisterliga-, serie- og cupmedaljar. Men trenaren er klar på at talet er alt for lågt.
– Eg trur det er betydeleg fleire enn det. Berre eg sjølv har jo 50, ler Vipers-sjefen.
Gjekstad trur talet er over 300 medaljar.
Vipers-trenar Ole Gustav Gjekstad og Nora Mørk står for mange av medaljane.
Foto: Sander Heggheim / NRKDrøymer om nytt gull i Europa
Vipers vann meisterligaen i fjor. No drøymer dei om å kopiere bragda.
Då må Krim slåast over to kampar. Den første vert spelt i Ljubljana søndag ettermiddag.
– Det byrjar å krible litt no. Eg føler det er lenge sidan vi har spelt veldig viktige kampar. Eg håpar vi er «på» søndag, seier Katrine Lunde.
– Eg er sikker på at alle er klare. Men vi skal treffe på dagsforma og finne nivået, seier Gjekstad.
– Må prestere på nytt heile tida
Katrine Lunde, Nora Mørk og Heidi Løke kan ta sitt sjette gull i meisterligaen dersom Vipers går heile vegen igjen.
Men Vipers-trenaren ber spelarane gløyme gamle triumfar.
– Det betyr ikkje så mykje no. Vi må prestere på nytt heile tida. Kva vi har gjort tidlegare er ikkje så viktig. Det er neste jobb som gjeld, seier Gjekstad.
– Er det meir medaljesvolt i dette laget?
– Ja, absolutt. Eg trur jo meir ein har vore med på vinne, jo meir sugen er ein på å ta det neste, seier Gjekstad.
Vipers Kristiansand løfta meisterligapokalen i Budapest i mai i fjor. No håpar dei på ny triumf i Europa.
Foto: ATTILA KISBENEDEK / AFPVann med 17 mål i februar
I februar var Vipers fullstendig overlegne då dei slo Krim 37-20. Etter det har den Krim styrka stallen med den slovenske stjerna Ana Gros og Tatjana Brnovic frå Montenegro.
Begge vart frigitt av sine russiske klubbar på grunn av krigen i Ukraina.
Gros har allereie markert seg sterkt i sin nye klubb.
– Krim er tydeleg styrka. Eg er spent på kor vi står etter ein pause. Gros må stoppast. Men vårt største problem i førre kamp var linjespelet deira. Eg trur ikkje Gros kjem til å skyte oss ut av kampen bak på bana. Vi må stoppe linjespelet også, seier Gjekstad.
Vipers må bryne seg på stjernespelaren Ana Gros i søndagens oppgjer mot Krim i Ljubljana. Her er Gros i aksjon i ein tidlegare kamp mot Vipers.
Foto: Tibor Illyes / AP