– Katrine er jo verdas desidert beste keeper, utan tvil. Ho er 41 år, men ser ikkje ein dag eldre ut enn 25. Det er imponerande korleis ho står fram gang etter gang, seier Vipers-spelar Heidi Løke som deler rom med Lunde på tur.
Som i søndagens semifinale var det keeper Katrine Lunde (41) og Henny Reistad (22) som spelte hovudrollene.
Lunde stengde buret og Reistad hadde stilt inn siktet akkurat der det skulle vere.
22-åringen gav seg ikkje før ho hadde scora 12 mål. Det blir det gull av.
– Eg føler vi har hatt trua på at vi kunne klare dette. Vi spelte ein bra semifinale i går og alle har verkeleg vore på. Vi står fram med autoritet og styrer frå start til slutt, seier Løke.
Rørt Lunde
Før kampen var ferdig zooma TV-kameraene inn på ei tårevåt Katrine Lunde. Ho har vunne meisterligaen før, men aldri med moderklubben.
Vipers vann 34-28 i Budapest.
Vipers gjekk ut i hundre i finalen og leia 7-2 då Nora Mørk hamra inn sitt første mål for dagen.
Det meste gjekk på skinner for sørlendingane heilt til Brest tok timeout. Seks minutt seinare stod det plutseleg 9-9.
– Det er ein fantastisk prestasjon. Eg trur ikkje folk forstår kor stort dette er. Lunde sluttar aldri å overraske. Ho er direkte avgjerande saman med Reistad, seier NRKs handballekspert Peder Langfeldt.
Meisterligafinalen var den siste Vipers-kampen til Henny Reistad. Neste sesong spelar ho i Esbjerg.
Linn Jørum Sulland avslutta handballkarrieren med meisterligagull. Ho legg opp etter sesongen.
Leia med sju mål
Mot slutten av første omgang kvikna Katrine Lunde skikkeleg til i Vipers-målet. Ho tok den eine store sjansen etter den andre. Det gjorde at Vipers leia 18-14 til pause.
Vipers starta andre omgang, som den første. Dei skrudde på turboen. Sju minutt ut i omgangen leia dei 23-16.
Fire minutt før slutt var det berre fire mål som skilde laga.
Men då Jana Knedlíková sette inn 30-25 og Lunde redda påfølgande angrep var det gjort.
Vipers Kristiansand er best i verda.
Andre gang i historia
Dette var Vipers sitt første internasjonale gull. Dei tok bronse i meisterligaen for to år sidan, medan det vart sølv i EHF-cupen i 2018.
Klubben hadde som mål å vinne meisterligaen innan 2023.
Berre ein gang tidlegare i historia har eit norsk lag vunne meisterligaen i handball for kvinner. Det klarte Larvik i 2011, då dei slo spanske S.D. Itxako.
Då var både Heidi Løke, Nora Mørk og Linn Jørum Sulland med på laget.
Sist eit lag frå Noreg var i ein meisterligafinale var i 2015. Då tapte Larvik mot Budućnost frå Montenegro. Dei tapte også finalen i 2013 mot Györ frå Ungarn.