Tøffe duellar skremde landslagslegen - vil ha nye reglar

Den tidlegare Start-spelaren, som opphavleg er frå Kristiansand, meiner mellom anna at legane ikkje får god nok tid til å undersøke spelarane etter stygge duellar.

– Sjølv om det er sjeldan, har hovudskadar potensial til å vere livsfarleg, og må takast på største alvor, seier Andersen til Nettavisen.

Under gårsdagens VM-finale mellom Argentina og Tyskland oppstod det fleire situasjonar der spelarar gjekk ned for teljing etter hovudduellar.

Verst gjekk det utover Tysklands Christoph Kramer og Ezequiel Garay etter ein kraftig duell. Begge kom på bana igjen etter behandling, men Kramer måtte seinare bytast ut, tydeleg prega etter smellen.

• Les også: – Definitivt ikke tidenes fotball-VM

Vil ha grundig undersøking

Seinare i kampen kom Tyskland-keeper Manuel Neuer ut på 16-meteren for å bokse ballen unna. Neuer kolliderte med Gonzalo Higuaín, som fekk ein skikkeleg smell.

Landslagslegen føreslår no to endringar for å hindre at spelarar, som har fått ein alvorleg smell i hovudet, kjem på bana igjen.

Han vil tillate eit mellombels byte, slik at den skada spelaren kan undersøkast grundig, før han eventuelt får halde fram med å spele.

– Det krev minst fem minutt å gjere ei kvalifisert undersøking, og denne sjekken bør gå føre seg i garderoben der ein har naudsynt ro og riktige hjelpemiddel, seier Andersen til Nettavisen.

• Les også: Fire av fem TV-seere så VM-finalen

Vil sjå TV-bilete

Andersen føreslår også at legane skal få studere TV-bilete etter eit samanstøyt.

Han peikar mellom anna på at det er to ting som er avgjerande for kor alvorleg skaden er. Kvar i hovudet treffet skjer, og om det oppstår ein rotasjon.

– Får det medisinske apparatet tilgang på dei same TV-bileta, som TV-sjåarane, vil ein mykje lettare kunne ta ei kvalifisert avgjerd om det er forsvarleg å la spelaren halde fram eller ikkje, seier Andersen.

Tyskland vann VM-finalen 1-0, etter ekstraomgangar i Brasil.