I 50 år har song kunne høyrast gjennom veggene frå Kommunestyresalen i Grimstad rådhus.
Kvart einaste kommunestyremøte blir starta med første vers av Fedrelandssalmen, eller «Gud signe det dyre fedrelandet vårt».
I dag bestemde kommunestyret at tradisjonen skal halda fram. Fleirtalet meiner dette er ein fin tradisjon som gir ein høgtideleg start på kommunestyremøta.
Det stod 21–14 for salmesong då stemmene vart talt opp.
Sjå politikarane syngja i gang dagens kommunestyremøte.
Meiner han er lite inkluderande
Venstres Vilde Haavik Tønnessen foreslo å avskaffa ordninga fordi ho meinte ho ikkje var inkluderande, men vart nedstemd.
– Eg synest det er merkeleg at me skal halda fram med dette. Eg trur det viser eit konservativt kommunestyre, seier ho.
Ho var ein av dei åtte som i dag valde å gå på gangen då forsongarane stemde opp til Fedrelandssalmen.
Ho kjem likevel ikkje til å ta opp saka på nytt.
– No legg eg denne saka bak meg, så får eg berre halda fram med å stå på gangen. Eg trur også me vil bli fleire som vel å stå på gangen.
Kommunestyrerepresentant Vilde Haavik Tønnessen (V).
Foto: Svein Sundsdal / NRK– Fin tradisjon
– Det er ikkje nokon grunn for meg til å feira, men samtidig var det viktig for meg å argumentera for å halda ved like det eg meiner er ein god tradisjon.
Det seier Dagfinn Fløystad, som er gruppeleiar for Kristeleg Folkeparti i Grimstad kommune.
Han meiner salmesongen seier noko om verdigrunnlaget til kommunen, og at han betyr mykje for mange av medlemmene i kommunestyret.
– Og eg trur også det betyr ein del for mange som bur i Grimstad, seier han.
Synest du ein skal syngja Fedrelandssamlen før politiske møte?
Opp til kvar enkelt
Ordførar Beate Skretting (H) seier ho hadde levd greitt med begge utfall.
Sjølv støtta ho Tønnessens forslag om å slutta med tradisjonen.
Med dagens avgjerd, kan politikarane få velja sjølv om dei vil syngja eller ikkje.
– Alle kan få velja kva dei ønskjer, anten å delta i songen, eller å stå på gangen. Det er opp til kvar enkelt, seier ho.
