Kommunen pålegg eigar å sikre drivhus

Nesten seks månader har gått sidan ei rekke gartneri i Grimstad blei øydelagde då eit kraftig snøvêr trefte Sørlandet.

Ennå er ingenting reparert.

Det er framleis ingen produksjon i dei fleste drivhusa til Kristiansens gartneri.

– Det er kjedeleg for oss som bur her. Ikkje er det fint å sjå på heller, seier nabo Andreas Gromsrud.

Han har tidlegare gått forbi med barnevogn, og fortel at han har sett eit par plater komme flaksande.

Nå har gartneriet fått pålegg av kommunen om å sikre delar av bygningsmassen.

Kan fly ut på E18

Næraste nabo for gartneriet er E18.

– Alle lause gjenstandar må sikrast, sånn at dei ikkje kan fly ut eller komme seg ut på E18. Han sa han skulle sette over eit nett. Det ville jo vere tilstrekkeleg.

Det seier Marius Raael som einingsleiar for byggesak i Grimstad kommune.

Gartneriet seier dei vil gjere det som trengst HMS-messig.

– Det må vi gjere forsikring eller ei. Men rein visuell opprydding, då ventar vi på midlar, seier Truls Haugsrud, driftsleiar ved J. Kristiansens Gartneri.

Forsikring framleis uavklart

Spørsmålet om kven som skal betale for skadane, er framleis uklart.

– Vi meiner framleis at vi har forsikringsdekning for dei skadane vi fekk som følge av uvêret på nyåret, seier Haugsrud.

Haugsrud meiner forsikringsselskapet Gjensidige har brukt skuffande lang tid, først på avslag, så responstid på klaga på avslaget.

Går truleg til retten

Gjensidige seier til NRK at dei meiner skadane ikkje er omfatta av forsikringa.

Sidan fleire gartneri har engasjert advokat og ønsker å få ei rettsleg avgjerd, vil dei ikkje seie noko meir om saka.

Skadane på gartneriet er i hundemillionersklassen, ifølge gartnaren.

Og så lenge det framleis er ei forsikringssak, kan ikkje gartnaren søke til staten om naturskadeerstatning.