– Eg har forsøkt å ringe og snakke med dei, men tydlegvis ynskjer dei ikkje å snakke med meg. Det har aldri skjedd før. Eg har snakka med utøvarar i nesten 50 år og det er ingen som hittil har nekta å snakke med meg før dette, seier friidrettspresident Svein Arne Hansen til NRK.no.
Onsdag vart det klart at Ida Marcussen droppar NM på heimebane i Kristiansand og heller reiser til utlandet for å konkurrere. Marcussen sa i går nei til å stille opp til eit TV-intervju med NRK, og seinere var ho ikkje tilgjengeleg på telefon.
– Underleg reaksjon
– Du ringer og legg igjen beskjed til Udelhoven og det er ingen reaksjon. Eg tykkjer det er ein meget meget underleg reaksjon, seier Hansen.
Trenar Lukas Udelhoven nektar for at duoen har gjort seg utilgjengeleg for friidrettspresidenten.
– Då har han kanskje ikkje telefonnummeret mitt. Eg er veldig open for ein dialog, seier Udelhoven.
– Eg har faktisk ein vond følelse for at vi ikkje stiller opp i NM. Vi hadde absolutt lyst til å bidra der. Eg har stor forståing for at mange er skuffa, både sponsorar og familie som hadde lyst til å komme og heie og sjå på Ida, seier trenaren.
SKUFFA: Det langsiktige målet til Ida Marcussen var medalje i London-OL. Kristiansandaren enda på 27. plass.
Foto: PHIL NOBLE / Reuters– Har ikkje krefter
Udelhoven seier at det var vanskeleg å droppe NM i Kristiansand, men at dei heller ville gjennomføre ein sjukamp, enn å konkurrere i enkeltøvingar på heimebane.
– Ida har ikkje meir krefter enn ho har og ho treng ein pause. Då er det å velje anten ein sjukamp eller enkeltøvingar i NM. Det er det, seier Udelhoven.
Friidrettspresidenten trudde at dei kunne nekte norske utøvarar å delta i stemner i utlandet samstundes som Norgesmeisterskapet blir arrangert. Men det er berre to nasjonar i Europa som har moglegheit til dette.
No har Svein Arne Hansen sett i gang ein prosess for å få lov til dette. Det kan bety strengare reglar for å unngå at dei beste norske friidrettsutøvarane skal droppe NM i framtida.
Varslar strengare reglar
– Vi har dessverre ikkje sanksjonsmoglegheiter til å nekte henne å delta i utlandet samstundes med hovudmeisterskapet. Vi har sett i gang ei utgreiing på dette. Dette skal vi ikkje ha noko meir av, seier Hansen.
I 2009 braut Ida Marcussen og trenar Lukas Udelhoven med friidrettslandslaget. Friidrettspresidenten trur eit framtidig landslagssamarbeid kan bli vanskelegare.
– Det er ikkje eg som tek ut til landslag, det er sportssjef Ronny Nilsen, men det er klart at det er vel ingen god søknad, seier Hansen.
