– Det er framleis lov å gjere opp bål, men ein skal vere sikker på at det ikkje kan ta fyr i terrenget.
Det seier brannsjef i Østre Agder brannvesen, Thoralf Bjørnbakk Juva.
Frå 15. april til 15. september er det generelt bålforbod i Noreg.
Flest brannar på Sørlandet
Det har vore over 100 brannar i heile landet så langt i år, ifølge tal frå Direktoratet for samfunnstryggleik og beredskap.
Desse tala gjeld for brann i gras og innmark, og dessutan skog og utmark.
Likevel er det totalt sett færre brannar enn på same tid i fjor, da hadde det vore 131 brannar i Noreg.
Så langt har Brann- og redningsvesenet i Rogaland hatt mest å gjere med 46 utrykkingar, mens det berre har vore 5 brannar i Agder.
Men om ein ser på dei siste åra har det vore klart flest brannar i Agder.
– Uvitig bålbrenning og bruk av open eld er dei vanlegaste årsakene til brannar i skog og utmark. Nå på våren ligg det mykje tørt gras og lauv igjen frå i fjor. Sjølv eit lite bål kan fort spreie seg og komme ut av kontroll, seier avdelingsdirektør Johan Marius Ly i DSB i ei pressemelding.
Går inn i høgsesongen
I 2023 var det 1257 brannar i ut- og innmark, der heile 80 prosent av brannane kom i perioden frå april til juni.
Da var det 11 hendingar i snitt i denne perioden.
Ansvarleg
Viss ein tenner opp eit bål er det den som har tent på bålet som er ansvarleg for elden.
– Vi oppfordrar folk til å følge med på skogbrannfareindeksen og vindforhold, slik at ein er sikker på at det ikkje kan ta fyr i terrenget, seier Thoralf Bjørnbakk Juva.
Han legg til at det om det blir tørre periodar med stor skogbrannfare kan det komme regionale eller nasjonale oppfordringar eller totalforbod mot å gjere opp eld.
– Folk er flinke til å følge med på kva media og brannvesenet seier. Det håpar vi folk held fram med. Eit totalforbod er ikkje noko vi gir støtt og stadig, seier han.